Оқиғаның мән-жайы анықталып жатыр, зардап шеккендерге медициналық көмек көрсетілді
Алматы қалалық полиция департаментінің қызметкерлері оқу-жаттығу кезінде жарық-дыбыстық гранатаның жарылуынан зардап шекті. Ведомство көптеген қызметкердің жарылғаны және олардың ауыр жағдайда екені туралы ақпарат шындыққа сәйкес келмейтінін мәлімдеді, деп хабарлайды Azattyq Rýhy Алматы қалалық ПД баспасөз қызметіне сілтеме жасап.
Оқиға туралы журналист Михаил Козачков өзінің Telegram-арнасында жазды. Жарияланған ақпаратта Алматы облысындағы оқу-жаттығу кезінде граната жарылып, Алматы қаласы полиция департаментінің 15 қызметкері жарақат алғаны, олардың екеуінің жағдайы ауыр екені айтылған.
Алайда полиция департаменті бұл мәліметті жоққа шығарды.
«Жоспарлы оқу-жаттығу кезінде адам өміріне қауіп төндірмейтін қол жарық-дыбыстық гранатасының мерзімінен бұрын жарылуы орын алды. Техникалық сипаттағы оқиғаға жақын жерде болған бөлімше қызметкерлеріне дер кезінде медициналық көмек көрсетілді. Қазіргі уақытта қызметтік тексеру жүргізіліп жатыр. Көптеген қызметкердің жарылғаны және олардың ауыр жағдайда екені туралы ақпарат шындыққа сәйкес келмейді», – деп мәлімдеді ведомство.
Алматы қалалық полиция департаменті азаматтарды расталмаған ақпарат таратудан сақ болуға шақырып, жалған мәлімет таратқаны үшін жауапкершілік қарастырылғанын еске салды.
Бұған дейін ҚР ҰҚК Терроризмге қарсы орталығының жедел штабы Қазақстан аумағында 5-30 маусым аралығында «Найза-Антитеррор-2026» республикалық антитеррорлық оқу-жаттығулары өтетінін хабарлаған болатын.