Ақтөбеде бала ойын алаңындағы темірге құлап, ауыр жарақат алды

Ақтөбе маңындағы Кеңес Нокин тұрғын алабында 11 жастағы бала ойын алаңында шығып тұрған темір штырьға шаншылып, ауыр жарақат алды. Оқушы шұғыл түрде ауруханаға жеткізіліп, ота жасалды. Әкімдік мәліметінше, екі жыл бұрын «Халық қатысатын бюджет» бағдарламасы аясында салынған нысан сараптама кезінде анықталған көптеген кемшілікке байланысты әлі күнге дейін пайдалануға берілмеген, деп хабарлайды Azattyq Rýhy КТК телеарнасына сілтеме жасап.

Әмір сыныптастарымен бірге соңғы қоңырауға дайындалып жүрген. Бірақ мерекенің орнына ол қазір аурухана палатасында жатыр. Бірнеше күн бұрын мектеп оқушысы әдеттегідей үй маңындағы алаңға ойнауға шыққан. Алайда серуен қайғылы жағдаймен аяқтала жаздады. Бала құлап кетіп, шығып тұрған темір істік денесіне кіріп кеткен.

«Оны сөзбен айтып жеткізу мүмкін емес. Аяғындағы кесілген жер өте терең болды. Баланы шұғыл алып кетіп, дереу ота жасады, тігіс салды. Қазір бұл алаң иесіз секілді. Оның нақты иесі жоқ. Әкімдік мердігерді, мердігер әкімдікті кінәлайды. Жазда біздің балалардың бәрі осында ойнайды. Ал бұл жер қауіпті», – дейді баланың әпкесі Данара Даришева.

Қазір Әмір сол аяғын баса алмайды, қатты ауырсынатынын айтып шағымдануда. Дәрігерлердің сөзінше, бала аман қалғанына өзі де бақытты. Егер темір артерияға тигенде, салдары әлдеқайда ауыр болуы мүмкін еді.

«Кешкі уақытта сол жақ жамбас тұсындағы жыртылған соғылған жарақатпен түсті. Қабылдау кезінде кезекші травматолог жараға алғашқы хирургиялық өңдеу жүргізді. Тігіс салынды. Сақтандыру дренажы қойылды. Қазіргі таңда баланың жағдайы қанағаттанарлық», – деді Ақтөбе облыстық көпсалалы балалар ауруханасы травматология бөлімінің меңгерушісі Әкімжан Аубакиров.

Оқиға болған алаң Кеңес Нокин тұрғын алабында небәрі екі жыл бұрын «Халық қатысатын бюджет» бағдарламасы аясында орнатылған. Бір қызығы, бұл алаңның салынуына дәл жарақат алған Амирдің әкесі мұрындық болған. Ол тұрғындардан қол жинап, құжат рәсімдеп, түрлі мекеменің табалдырығын тоздырған. Алайда қауіпсіз ойын алаңының орнына тұрғындар өзіне қауіп төндіретін нысанға тап болған.

Шенеуніктер алаң көптеген заңбұзушылықпен салынғанын мойындап отыр. Сол себепті ол әкімдік балансына қабылданбаған.

«Сот сараптамасының қорытындысы бойынша бұл балалар алаңы сапасыз деп танылды. Осы себепті мердігер төлем алған жоқ. Бірінші инстанция соты мен апелляциялық сот біздің талап-арызымызды қолдады. Алайда мердігер бұған келіспей, Алматы ауданы әкімдігі үстінен Жоғарғы сотқа шағым түсірді. Ол өзіне ақша төленбей жатқанын және атқарылған жұмыс қабылданбағанын айтып отыр. Қазір Жоғарғы соттың шешімін күтіп отырмыз», – деді Ақтөбе қаласы Алматы ауданы әкімдігінің ТКШ бөлімінің бас маманы Жәдігер Балтабай.

Енді сот мердігерді кемшіліктерді өз есебінен түзетуге міндеттей ме, әлде қауіпті алаң толық сүріле ме, соны шешуі тиіс. Шенеуніктердің мәліметінше, алаңның құны 33 миллион теңгені құраған. Ал ересектер соттасып жүргенде, балалар күн сайын кез келген сәтте тағы біреуді жарақаттауы мүмкін конструкциялардың арасында ойнауға мәжбүр. Өйткені олардың баратын басқа жері жоқ.