Павлодар облысында үш балықшы мінген көлік мұз астына түсіп кетті
Олар көлікпен су айдынына шыққан
Павлодар облысында балық аулауға шыққан азаматтар ажалдан аман қалды. Екібастуз ауданында жеңіл көлік мұз астына түсіп кеткен, деп хабарлайды Azattyq Rýhy.
Шықылдақ ауылы маңындағы төтенше жағдай
Оқиға сейсенбі күні Екібастуз ауданына қарасты Шықылдақ ауылының маңында болған. Балық аулауға құмар жандар мұздың жұқаруына қарамастан, көлікпен су айдынына шыққан.
Мұз көлік салмағын көтере алмай, темір тұлпар бірден су астына кетті. Көлік ішіндегі үш адам дер кезінде сыртқа шығып үлгерген. Оқиға орнына жеткен ТЖД мамандары балықшыларды эвакуациялап, Шідерті кентіне жеткізді.
Зардап шеккендер жоқ, оларға медициналық көмек қажет болған жоқ.
Мұз үстіне шығу: Айыппұл және жауапкершілік
Құтқарушылардың көмегімен аман қалған көлік иесі енді заң алдында жауап береді. Қазіргі уақытта су айдындарындағы қауіпсіздік ережелері өте қатаң бақылануда.
Су айдындарындағы қауіпсіздік қағидаларын сақтамағаны үшін көлік иесіне қатысты әкімшілік хаттама толтырылды. Ол ҚР ӘҚБтК-нің 412-бабы бойынша жауапкершілікке тартылды.
ТЖД ескертуі
ТЖД мамандары көктемгі уақытта мұздың құрылымы өзгеріп, өте морт болатынын, сондықтан су айдындарына көлікпен шығуға мүлдем болмайтынын тағы да ескертеді.
«Бұл жолы балықшылардың жолы болды, бірақ мұндай қателік адам өмірін қиюы мүмкін еді», — дейді құтқарушылар.
Көп оқылған
