Теміртауда ер адам автобуста 18 жастағы жігіттің аяғына пышақ сұғып алды

Теміртауда №107 автобуста екі жолаушы арасында жанжал шықты. Төбелеске олардың бірінің желдеткіш терезені ашуға әрекеттенуі себеп болған, деп хабарлайды Azattyq Rýhy Temirtau City басылымына сілтеме жасап.

Ауызша жанжал төбелеске ұласып, 30 жастағы ер адам пышақ шығарып, 18 жастағы жолаушының аяғынан жарақаттаған. Жігіттен қан кеткен.

Автобус тоқтатылып, жедел жәрдем мен полиция шақырылды. Дәрігерлер келгенге дейін жолаушылар жараланған жігіттің аяғын шарфпен таңып берген. Жедел жәрдем бригадасы алғашқы медициналық көмекті оқиға орнында көрсетті. Зардап шеккен азамат ауруханаға жатқызылған жоқ.

Қарағанды облысы полиция департаментінің хабарлауынша, оқиға орнында полиция қызметкерлері 30 жастағы күдіктіні анықтап, ұстады. Ол уақытша ұстау изоляторына қамалды.

«Қазіргі уақытта болған оқиғаны жан-жақты және объективті тергеуге бағытталған барлық қажетті тергеу әрекеттері жүргізіліп жатыр. Тергеу барысы полиция департаментінің бақылауында болады», – деп мәлімдеді ведомствоның баспасөз қызметі.