Қазақстанда Жаңа жыл кезінде пойыз бен ұшақ билеттері қымбаттай ма

Автор: Нұргүл Абай

Мереке қарсаңында қосымша пойыздар жолға шығады

Фотоколлаж: Azattyq Rýhy/Әбілқасым Есентаев

Көлік вице-министрі Мақсат Қалиақпаров алдағы мереке күндері пойыз бен ұшақ билеттерінің бағасы өзгермейтінін айтты, деп хабарлайды Azattyq Rýhy.

Оның айтуынша, билет бағасы жаңажылдық мерекелер кезінде де, келесі жылы да көтерілмейді.

«Жалпы билеттер қымбаттамайды. Жолаушылардың елу пайыздан астамы сапарларын алдын ала жоспарлап, билетті ертерек сатып алады, тиісінше олардың бағасы да арзан болады», - деді Қалиақпаров Үкіметтегі баспасөз мәслихатында.

Вице-министр мереке қарсаңында қосымша ұшақтар мен пойыздар іске қосылатынын атап өтті.

«Әуе тасымалдаушылары қосымша ұшақтарды дайындап қойды, жолаушылар орнын көбейту де, рейс жиілігін арттыру да қарастырылған. Негізгі бағыттар – Алматы, Шымкент, Тараз», – деді ол.

Бұған қоса теміржол бағыттарында да қосымша орындар пайда болады.

«Теміржол қатынасы бойынша қосымша пойыздар жолға шығады. Қолданыстағы бағыттарға жолаушы орындарын көбейту үшін тіркемелі вагондар қосылады», – деді шенеунік.