Қазақстан Аралды қалай сақтап қалады: министр жаңа жоба туралы айтты

Су ресурстары және ирригация министрі Нұржан Нұржігітов Аралды қалпына келтіру жұмыстары қалай жүріп жатқанын айтты, деп хабарлайды Azattyq Rýhy.

Оның айтуынша, министрлік құрылғаннан бері Солтүстік Аралға шамамен 5 млрд м³ су жіберілген. Су айдынының көлемі 24,4 млрд м³-ке дейін ұлғайған.

«Қазір Дүниежүзілік банктің гранты есебінен «Арал теңізінің солтүстік бөлігін қалпына келтіру және өңірлік дамыту» жобасының техникалық-экономикалық негіздемесі әзірленіп жатыр», - деді Нұржігітов Үкімет отырысында.

Жоба аясында Солтүстік Арал теңізін құрғатпай, Көкарал бөгетінің биіктігін 2 метрге көтеру, сондай-ақ Қамыстыбас және Ақшатау көлдер жүйесінің су деңгейін толықтыру және ұстап тұру үшін Аманөткел-2 гидроторабын салу нұсқалары қарастырылып жатыр.