Қазақстан ет экспортын жылына 50 мың тоннаға дейін ұлғайтады
Мал шаруашылығы саласына аустралиялық тәжірибе енгізіледі
Қазақстан ет экспортын жылына 50 мың тоннаға дейін арттыруды жоспарлап отыр. Бұл туралы ауыл шаруашылығы министрі Айдарбек Сапаров мәлімдеді, деп хабарлайды Azattyq Rýhy.
Оның айтуынша, етті мал шаруашылығында аустралиялық тәжірибені енгізу жобалары іске қосылады.
«Бұл жобалардың іске асырылуы жылына 50 мың тоннаға дейін ет экспорттауға және 500 млрд теңге көлемінде табыс әкелуге мүмкіндік береді. Аустралиялық тәжірибе негізінде жүзеге асырылатын 14 жобаға 29,3 млрд теңге қарастырылған», - деді Сапаров Үкімет отырысында.
Министр мал шаруашылығының өзге де бағыттары назардан тыс қалмағанын атап өтті. Мәселен, соңғы бес жылда құс еті өндірісін ұлғайту есебінен құс шаруашылығы саласындағы өзін-өзі қамтамасыз ету деңгейі 58%-дан 80%-ға дейін ұлғайған. Өндіріс көлемі 2020 жылғы 235,3 мың тоннадан 2024 жылы 358,7 мың тоннаға дейін өсті. Алдағы уақытта бұл сала толық өзін-өзі қамтамасыз ету деңгейіне жетеді.
