Еңбекмині еңбек қауіпсіздігін тексеру үшін Абай облысына аттанды

Абай облысындағы өрт кезінде адам шығынына әкелген еңбек қауіпсіздігі мен еңбекті қорғауды бұзу себептерін Еңбекмині анықтайды, деп хабарлайды Azattyq Ruhy.

Еңбек және халықты әлеуметтік қорғау министрлігінің өкілдері арнайы Үкіметтік комиссия құрамында Абай облысына ұшып кетті. Мемлекеттік органның қызметкерлері «Семей орманы» мемлекеттік орман табиғи резерватының аумағында өртті сөндіру кезінде еңбек қауіпсіздігі және еңбекті қорғау талаптарының бұзылуына жол берген адамдарды анықтау үшін тергеу жүргізеді. Сондай-ақ, ведомство өкілдері зардап шеккендердің отбасыларына қажетті әлеуметтік көмек көрсету көлемін анықтайды.

«Абай облысындағы «Семей орманы» мемлекеттік орман табиғи резерваты» РММ аумағында өрт салдарынан болған топтық жазатайым оқиғаның себептері мен мән-жайларын тергеу үшін ҚР Премьер-Министрінің бірінші орынбасары Роман Склярдың төрағалығымен арнайы Үкіметтік комиссия құрылды. Комиссия құрамына төрағаның орынбасары болып еңбек және халықты әлеуметтік қорғау вице-министрі Олжас Ордабаев, сондай-ақ Еңбек және халықты әлеуметтік қорғау комитетінің төрағасы – ҚР Бас мемлекеттік еңбек инспекторы Төлеген Оспанқұлов, басқа да орталық мемлекеттік органдардың, облыс әкімдігінің, жұмыс берушілердің және жұмыскерлер кәсіподағының өкілдері енгізілді», - деп хабарлады министрліктің баспасөз қызметі.

Бұдан басқа, арнайы комиссия келтірілген залалдың көлемін белгілеп, зардап шеккендер мен қаза тапқандардың отбасыларына бірінші кезектегі көмек көрсету жөнінде шаралар қабылдайтын болады.

Арнайы Үкіметтік комиссия жұмысты 10 жұмыс күні ішінде аяқтайды. Тергеу нәтижелері туралы қосымша хабарланатын болады.