Қазақстан азаматтарын эвакуациялау үшін Қытайға тағы екі ұшақ жіберіледі
Қазақстан үкіметі Ухань қаласында тараған қауіпті коронавирусқа байланысты Қытайдағы өз азаматтарын эвакуациялауды жалғастырады. Бұл туралы Сыртқы істер министрлігінің баспасөз қызметі хабарлайды.
«10 және 12 ақпанда Қытай билігімен келісім бойынша қазақстандық азаматтарды эвакуациялау үшін Бейжіңге «Air Astana» әуекомпаниясының екі ұшағы жіберіледі. Ұшу барысында жолаушылармен бірге медициналық қызметкерлер болады. Қытай тарапының өтініші бойынша осы рейстер арқылы Бейжіңге Қазақстандағы 47 қытай азаматын, сондай-ақ Қытай елшілігінің коммерциялық емес жүгін жеткізу жоспарлануда», - делінген ведомство хабарламасында.
Қазіргі уақытта ҚХР аумағында 719 Қазақстан азаматы бар, олардың 391-і отанына оралуға көмек көрсету туралы өтініш білдірген. Қалғандары - дипломатиялық мекемелердің қызметкерлері мен отбасы мүшелері, студенттер және басқа да жеке тұлғалар Қытайда қалуға тілек білдірді.