Алексей Цой дәрігерлердің өтемақысы бойынша есеп беру үшін Мәжіліске шақырылды

Мәжіліс спикері дәрігерлерді қолдау шаралары тиісті деңгейде орындалмағанын айтты

Алексей Цой дәрігерлердің өтемақысы бойынша есеп беру үшін Мәжіліске шақырылды
Фото: ortcom.kz

Мәжіліс төрағасы Нұрлан Нығматулин коронавирус жұқтырған медицина қызметкерлеріне және індеттен көз жұмған дәрігерлерге өтемақы төлеу мәселесі Денсаулық сақтау министрі Алексей Цойдың қатысумен қаралатынын айтты.

«Медицина қызметкерлері өте қиын жағдайда жұмыс істеді. Қауіптің алдыңғы шебінде тұрды. Кейбіреуінің денсаулығы нашарлап, кейбір дәрігерлер қайтыс болды. Осы бағытта дәрігерлерді қолдау шаралары тиісті деңгейде орындалмаған. Жақын арада «Nur Otan» партиясы фракциясына Денсаулық сақтау министрі және басқа мемлекеттік органдардың басшыларын шақырамыз. Олар осы мәселеге қатысты есеп беруі керек», - деді Мәжіліс төрағасы.

Соңғы ақпарат бойынша, Мемлекеттік әлеуметтік сақтандыру қорынан COVID-19 инфекциясын жұқтырған және вирустық пневмониямен ауырған 1965 медицина қызметкеріне өтемақы төленді. Сондай-ақ індеттен қайтыс болған 26 медицина қызметкерінің туыстарына 10 млн теңгеден төлем аударылды.

×
Бұл желілік ресурстың ақпараттық өнімдері 18 жастан асқан адамдарға арналған.