Үкімет Яндекстегі ақаудан кейін отандық Qajet такси қызметін дамытуға мықтап кіріскен көрінеді

Автор: Бақыт Шынар

Жүйеге Қазақстанның картасы мен геосервистері енеді

Фотоколлаж: Azattyq ruhy/Әбілқасым Есентаев

Жуырда Яндекс қосымшасынан ақау шыққаннан кейін Қазақстанның отандық Qajet сервисі туралы көп әңгіме айтыла бастаған еді. Айта кетейік, Qajet қосымшасын Қазақстанның мамандары жасап шығарған және  күнделікті қала ішінде жүруге арналған такси шақыру қызметі. Қосымшаның нарықтағы басқа қосымшалардан ерекшелігі –  бұл шетелдік емес, Қазақстанда жасалған отандық жоба және толықтай қазақ тіліне бейімделген. Тіпті навигаторы да қазақша сөйлейді, деп жазады Azattyq Rýhy

Бүгін, 17 қараша күні Жасанды интеллект және цифрлық даму министрі Жаслан Мәдиев осы қосымшаға картографиялық деректер мен геосервистерді енгізу мәселесін талқылаған.

«Премьер-министрдің орынбасары, Жасанды интеллект және цифрлық даму министрі Жаслан Мәдиевтің төрағалығымен отандық картографиялық деректер мен геосервистерді қазақстандық Qajet такси шақыру сервисіне интеграциялау мәселесі бойынша жұмыс тобының отырысы өтті», -деп хабарланған министрліктің ресми сайтында.

Яғни, дереккөзге сүйенсек, министрлік «Ұлттық геодезия және кеңістіктік ақпарат орталығының» цифрлық карталары мен геосервистерін коммерциялық сервисте пайдалану мүмкіндігін пысықтап жатыр.

«Бастаманың мақсаты – мемлекеттік цифрлық картографиялық негізді бизнес саласында іс жүзінде қолдану және Қазақстанның өз навигациялық технологияларын дамыту», - деп мәлімдеді министрліктен.

Егер отандық өнімге цифрлық карталар енетін болса, онда такси шақыру қызметі Қазгеодезияның цифрлық карталарын пайдаланып, сондай-ақ мекенжайларды іздеп, геокодтау және маршруттарды құру мүмкіндіктерін дамыта алады.

Естеріңізге сала кетейік, бұл мәселені бұған дейін Құрылтай депутаты, «Әділет» партиясы фракциясының мүшесі Ләззат Жылқыбаева да қозғап, Бас прокурор Берік Асыловқа, премьер-министрдің орынбасары – жасанды интеллект және цифрлық даму министрі Жаслан Мәдиевке сауал жолдаған болатын. Депутат такси шақырудағы қиындықтан бөлек, бұл шетелдік сервис арқылы қазақстандықтардың жеке мәліметтерді тарап кеткенін айтып, түйткілді мәселе қозғаған болатын.