«Жылқы – 7,9%, шошқа – 1,5%»: Сапархан Омаров бес айда мал басы қанша пайызға өскенін айтты

Үкімет отырысында ҚР Ауыл шаруашылығы министрі Сапархан Омаров осы жылдың 5 айындағы агроөнеркәсіптік кешеннің дамуы туралы ақпарат берді, деп хабарлайды мекеменің баспасөз қызметі.

Министрдің айтуынша, жыл басынан бері ауыл шаруашылығының жалпы өнімі 2,2 пайызға артып, 1 трлн теңгеге жуықтады. Бұл өсім мал шаруашылығы өнімінің 2,3 пайызға ұлғаюы есебінен қамтамасыз етілді. Атап айтқанда, сойылған мал етінің салмағы – 3,5%, сүт 3,2% артық өндірілді.

«Сонымен қатар, ірі қара мал басы – 4,1%, қой – 2,8%, жылқы –7,9%, түйе – 4,4% және шошқа 1,5%-ға өсті. Азық-түлік өндірісі 2,3% артып, 743 млрд теңгеге дейін жетті. Шұжық өндірісі 20,5% -ға (23,6 мың тоннаға дейін), макарон өнімдері - 16,1% -ға (77,5 мың тоннаға дейін), май - 14,7% -ға (8 мың тоннаға өсті.), жарма - 13,5% -ға (37,2 мың тоннаға дейін), ұн - 6,6% -ға (1,38 млн тоннаға дейін), өсімдік майы - 5,3%-ға (198 мың тоннаға дейін), қышқыл сүт өндіріс - 4,8% -ға (92,3 мың тоннаға дейін), ірімшік пен сүзбе - 4,7%-ға (13 мың тоннаға дейін) өсті»,- деді министр.

Ауыл шаруашылығының негізгі капиталына салынған инвестициялар 5 айда 14,3%-ға өсіп, 145,1 млрд теңгені құрады. Сондай-ақ, Сапархан Омаров өсімдік шаруашылығы туралы да ақпарат беріп, биылғы жылы көктемгі дала жұмыстарын уақтылы жүргізу үшін барлық қажетті шаралар қабылданғанын айтты.

«Бүгінгі таңда егін егу жұмыстары толығымен аяқталды. Фермерлер дер кезінде қаржысы жеңілдетілген жанар-жағар маймен, сапалы тұқымдармен, тыңайтқыштармен, техникамен қамтамасыз етілді. Ылғалды жабу және егу алдындағы өңдеуді дәл уақтында жүргізгендіктен арамшөптер жойылып, топырақтың ылғалы да жақсы сақталды. Егіс науқаны жылдам және уақытылы аяқталды. Нәтижесінде, көшеттер жақсы және толық өсуде», - деп атап өтті министр.

Алдағы негізгі мәселе – дақылдарды фитосанитариялық қорғау. Пестицидтерді сатып алуға субсидиялау үшін 37 млрд теңге қарастырылған.

Жалпы, 5 айдың қорытындысы бойынша еліміздің ауыл шаруашылығында оң динамика байқалады, Үкімет жоспарланған нәтижеге қол жеткізу үшін саланы дамыту бойынша барлық қажетті шараларды қабылдады.