Ұлыбритания Қазақстанға салатын инвестиция көлемін ұлғайтты
Бірақ екі ел арасындағы тауар айналымы айтарлықтай төмендеген
Соңғы 10 жыл көлемінде Ұлыбританияның Қазақстанға салған тікелей инвестиция көлемі 8,8 млрд АҚШ долларына жетті. Жалпы, Ұлыбритания Қазақстанға ең көп инвестиция салатын үздік үш елдің қатарына кіреді. 2019 жылдың алғашқы жартыжылдығындағы инвестиция көлемі 17,2%-ға өсіп, 336,5 млн долларды құрады (өткен жылы 287 млн доллар). Бұл мәліметтерді finprom ұсынды.
Сондай-ақ бұл көрсеткіш жыл сайын артып келеді. Мәселен, 2017 жылы Ұлыбританиядан Қазақстанға тартылған тікелей инвестиция 533,8 млн долларды құраса, 2018 жылы бұл көрсеткіш 593,1 млн долларға жеткен. Осылайша соңғы 10 жыл көлеміндегі 8,8 млрд АҚШ долларына жеткен.
2018 жылдың 12 айы бойынша Қазақстан мен Ұлыбритания арасындағы тауар айналымы 1,3 млрд долларға жеткен. Тауар айналымының негізгі үлесін қазақстандық экспорт пен қызмет түрлері құрайды – 63% (793,9 млн доллар), ал Ұлыбритания импортының үлесі 37% көрсеткішке жеткен (466,8 млн доллар). Алайда, қаңтар-тамыз айлары аралығындағы көрсеткіш бойынша екі ел арасындағы тауар айналымы 18%-ға төмендеген. Оның басты себебі - Қазақстанның Ұлыбританияға шығаратын экспорт көлемінің 30,2%-ға төмендеуінен.
Соңғы мәлімет бойынша, британдардың қатысуымен Қазақстанда 644 заңды тұлғалар, филиалдар мен өкілдіктер тіркелген. Олардың ішінде британ капиталының қатысуымен қазір жұмыс істеп тұрғаны 395: 345 шағын, 20 орташа, 30 ірі компания.
Еңбек және халықты әлеуметтік қорғау министрлігінің мәліметінше, бүгінде Қазақстанда 1,4 мың британиялық еңбек мигранттары бар. Қазақстандағы британ инвесторларын қызықтыратын негізгі сала - кәсіби, ғылыми және техникалық қызмет. Бұл салаға британдықтар 7,8 млрд доллар инвестиция құйған (жалпы соманың 34,3%-ы). Мемлекеттік басқару және қорғаныс, сондай-ақ міндетті әлеуметтік қамсыздандыру саласына 5,3 млрд доллар, транспорт, өмір сүру және тамақтану қызметіне 2,6 млрд доллар салған.
Сондай-ақ британ инвесторлары қаржы және сақтандыру ісіне 2,4 млрд доллар, тау-кен және карьерлер қазу бойынша 1,8 млрд доллар көлемінде қаржы салған.
