Ұлттық банк 1 шілдеге дейін Елордаға көшеді
Президент Қасым-Жомарт Тоқаев Ұлттық банкті Алматыдан Нұр-Сұлтан қаласына көшіру туралы қаулыға қол қойды. Қаулыға сәйкес, елдің бас қаржы ұйымының орталық кеңсесі 1 шілдеге дейін астанаға келіп, «Мәңгілік ел» көшесіндегі 57А ғимаратында жұмысын жалғастыруы тиіс.
«2020 жылғы 1 шілдеге дейін Қазақстан Республикасы Ұлттық банкінің орталық аппаратын Алматы қаласынан Нұр-Сұлтан қаласына көшіруді қамтамасыз етсін», - делінген құжатта.
Мемлекет басшысының шешіміне байланысты Алматы қаласының әкімі Бақытжан Сағынтаев пікір білдіріп үлгерді. Оның айтуынша, қала экономикасы үшін Ұлттық банк орталық аппаратының Елордаға көшірілуі алматылықтар үшін қуанышты жағдай емес. Себебі, Ұлттық банкпен бірге басқа банктердің де бас ғимараттары қаладан көшіп кетуі мүмкін.
«Мен Ұлттық банктің Алматыда қалғаны дұрыс деп былтырдан бері айтып келе жатырмын. Түрлі дәлелдер келтіріп, Елбасыға хат та жаздым. Бірақ шешім оған дейін қабылданып қойған еді. Оның үстіне, банк Ұлттық банк және Қаржы нарығын реттеу, дамыту агенттігі болып екіге бөлініп кетті. Ақша-монеталық жұмыспен айналысатындар көшеді де, нарықты реттеу агенттігі қалада қалады. Мұның өзі жақсы. Ұлттық банк кетсе, басқа банктер де кетеді деп талай айттық. Бәрі кетіп қалса, әрине, ауыр тиеді. Бірақ Ұлттық банк карантин уақытында көшеді деп ойламаймын. Алайда, «салықтан айырылдық, ойбай, енді қалай өмір сүреміз» деудің қажеті жоқ. Жоғалтқан салығымызды қаланың экономикасын дамыту арқылы толтыруымыз керек»,- деген оптимистік ой білдірді ол БАҚ өкілдерімен онлайн-кездесуде.
Осылайша, Ұлттық банктен бөлініп шыққан, Мадина Әбілқасымова басқаратын Қаржы нарығын реттеу және дамыту агенттігі Алматыда қалады да, Ерболат Досаев өз командасымен толық Елордаға көшіп келмек. Бірақ Ұлттық банктің өзі қаулыға байланысты әлі ресми пікір білдірген жоқ.
Еске салайық, Ұлттық банкті көшіру туралы мәселе Алматы қаласы астана статусын жоғалтқалы бері талқыланып келе жатыр.
Абай Сейфулла, Нұр-Сұлтан