Қазақстанның ЕАЭО елдеріне экспорты 9,5% өсті

Былтыр Қазақстан мен ЕАЭО елдерімен өзара сауда көлемі $28 млн-нан асты, деп хабарлайды Azattyq Ruhy.

«2023 жылғы қаңтар-желтоқсанда Қазақстан Республикасының ЕАЭО елдерімен өзара сауда көлемі 28 517,8 млн АҚШ долларын құрап, өткен жылдың сәйкес кезеңімен салыстырғанда номиналды мәнде 2,8% азайды», - деп хабарлады Ұлттық статистика бюросы.

2023 жылғы қаңтар-желтоқсанда тауарлар экспорты 11 054,1 млн АҚШ доллары (9,5% көп), импорт – 17 463,7 млн АҚШ доллары (9,3% аз) деңгейінде қалыптасты.

Қазақстан Республикасының ЕАЭО елдерімен сыртқы сауда айналымының жалпы көлемінде Арменияға 0,2%, Беларусқа – 3,2%, Қырғызстанға – 5,5%, Ресейге 91,1% тиесілі.

Жекелеген жағдайларда қорытынды мен қосылғыштар сомасы арасындағы шамалы айырмашылықтар деректерді дөңгелектеумен түсіндіріледі.

ЕАЭО елдерімен экспорттағы ең жоғары үлес химия және онымен байланысты өнеркәсіп салаларының өнімдеріне тиесілі – 26,4%, одан кейін машиналар, жабдықтар, көлік құралдары, аспаптар мен аппараттарға тиесілі –25,5%.

ЕАЭО елдерінен Қазақстанға әкелінетін импорт құрылымында металдар және олардан жасалған бұйымдар –19,4%, одан кейін машиналар, жабдық, көлік құралдары, аспаптар және аппараттар – 19,3%.