Жыл басынан бері қанша шаршы метр тұрғын үй пайдалануға берілді?

Үкімет отырысында Ұлттық экономика министрі Әлібек Қуантыров жыл басынан бері қанша шаршы метр тұрғын үй пайдалануға берілгенін айтты, деп хабарлайды Azattyq Ruhy.

«Биылғы қаңтар-шілдеде 8,6 млн шаршы метр тұрғын үй пайдалануға берілді, бұл өткен жылдың сәйкес кезеңімен салыстырғанда 11,7%-ке жоғары. Тұрғын үйді пайдалануға берудің ең жоғары көрсеткіштері Ұлытау және Абай облыстарында, сондай-ақ Алматы және Астана қалаларында байқалды.Ауыл шаруашылығының жалпы шығарылымы 2,6%-ке ұлғайды. Саладағы өндірістің өсуі 16 өңірде тіркелді. Ең жоғарғы өсімді Маңғыстау, Шығыс Қазақстан, Ақмола және Павлодар облыстары көрсетті», - деді Қуантыров.

Оның айтуынша, 7 экономикалық көрсеткіш бойынша өңірлер арасындағы жалпы жағдай әртүрлі.

«Барлық көрсеткіш бойынша оң өсім 6 өңірде – Абай, Ақмола, Батыс Қазақстан, Қостанай, Солтүстік Қазақстан облыстарында, сондай-ақ Алматы қаласында байқалды», - деді ол.

Экономикалық өсімді қамтамасыз ету мақсатында орталық және жергілікті атқарушы органдарға келесі шараларға назар аудару ұсынылды:

• Уақытылы егін жинауды және құрылыс жұмыстарының маусымын тиімді жүргізуді қамтамасыз ету;
• Экспорттың өсуін қалпына келтіру үшін қосымша шаралар қабылдау және баламалы бағыттарды тиімді пайдалануды қамтамасыз ету; 
• Белсенді түрде инвестициялар тарту және бюджет қаражатын тиімді игеру;
• Әлеуметтік маңызы бар азық-түлік тауарлары бағаларының өсуін болдырмау бойынша шаралар қабылдау және тұрақты мониторинг жүргізу;
• Тұрақты және уақытша жұмыспен қамту шараларын қолдау арқылы еңбек нарығындағы тұрақтылықты қамтамасыз ету.

Авторы: Аягөз Құрмаш