Елімізде қант өндірісі жеті есеге ұлғаяды – министр

Қазақстан қант өндірісін жеті есеге ұлғайту арқылы ішкі нарықты 43 пайызға дейін отандық қантпен қамтамасыз етуді жоспарлап отыр. Бұл туралы Үкімет отырысында ҚР Ауыл шаруашылығы министрі Ербол Қарашөкеев айтты, деп хабарлайды Azattyq Rýhy тілшісі.

Министр мәліметінше, халқымыздың қантты жылдық тұтыну көрсеткіші шамамен 532 мың тонна болса, оның жеті пайызы отандық шикізат есебінен алынуда.

«Бұған ұсақ өндіріс, су тапшылығы, қант қызылшасын өсіруге қажетті қол еңбегі, сондай-ақ қант зауыттарының ескіруі, ресейлік өндірушілердің демпингтік бағасы себеп болып отыр», -ьдеп атап өтті министр.

Ведомство басшысы сумен қамтамасыз ету мәселесін шешу, егіс алқабын 14,5 мың гектардан 38 мың гектарға дейін кеңейту, техникалық жарақтандыру, сондай-ақ саланың инфрақұрылымын дамыта отырып, қант зауытын жаңғырту және салу жобаларын іске қосу, өнім көлемін арттыру есебінен жалпы өнімді 332 мың тоннадан 1,8 млн тоннаға дейін арттыруға болатынын айтты.

«Яғни, қант өндірісін 254 мың тоннаға дейін жеті есеге ұлғайту, қант импортын 32 пайызға азайту болжанып отыр. Бұл ішкі нарықты өзімізде өндірілген қантпен қамтамасыз етуді 7 пайыздан 43 пайызға дейін арттыруға мүмкіндік береді. Сонымен қатар, жоғарыда айтылған нәтижелерге қол жеткізу үшін 5-6 жыл ішінде субсидиялар мен жеңілдетілген несиелер беру арқылы мемлекеттік қолдау көрсетілуі қажет», - деді Е. Қарашөкеев.