Ақтөбеде Есет батырдың 355 жылдығына арналған ақындар айтысы өтті

Есет батыр Көкіұлының 355 жылдығына арналған шаралар аясында Ақтөбе қаласында өткен республикалық айтыста Абай облысынан келген ақын Рүстем Қайыртай бас жүлдеге ие болды.

«Атасының есімін асқақтатқан,
Арда жұрты, армысың, Ақтөбенің!» (Серік Қуанған) – деп, еліміздің әр өңірінен келген ақындардың айтысын жұртшылық екі күн бойы тамашалады.

Айтысқа барлығы 16 ақын қатысқан еді. Солардың арасынан екінші кезеңге 8 ақын шығып, төрт жұп болып: Серік Қуанған (ШҚО) мен Рауан Қайдаров (Павлодар облысы), Қазырет Бердіхан (Алматы қаласы) мен Біржан Байтуов (Шымкент қаласы), Рүстем Қайыртай (Абай облысы) мен Шұғайып Сезімхан (Алматы қаласы) және Жұлдыз Қожабекова (Ақтөбе облысы) мен Шалқарбай Ізбасаров (Атырау облысы) айтысты.

Сондай-ақ, Біржан Байтуов, Рауан Қайдаров, Жұлдыз Қожабекова, Шұғайып Сезімхан, Қазырет Бердіхан, Шалқарбай Ізбасаров сынды ақындар да жүлдеге ие болды.

Бас жүлде иегеріне 1,5 миллион теңге көлемінде қаржылай сыйақы сертификаты тапсырылды.