Елордада «Ұлы дала» республикалық шығармашылық байқауының жеңімпаздарын марапаттау рәсімі өтті

Рухани шараны «Nur Otan» партиясы мен Қазақстан Жазушылар одағы бірлесіп ұйымдастырды, деп хабарлайды Azattyq Rýhy тілшісі.

Байқау бірнеше аталым бойынша өткізілді. Комиссия құрамында жазушы Әлібек Асқар, Қуаныш Жиенбай, ақын Ақберен Елгезек, Оңайгүл Тұржан, кинодраматург Айгүл Кемелбаева болды. Қатысушылардың еңбегі 1 қазан мен 30 қараша аралығында қабылданды. Байқауға республиканың түкпір-түкпірінен 18 бен 40 жас аралығындағы қаламгерлерден бас-аяғы 400-ге тарта шығарма келіп түсіп, оның ішінде 287-сі ереже талаптарына сай деп танылған.

«287 шығарманың 173-і – поэзия, 52 – прозалық шығарма, 43 – балаларға арналған туынды, 10-ы – драматургия бағытында, 9-ы – көркем фильм мен телесериал жанры бойынша жазылған. Осылардың бәрін қарап шықтық. Үздіктерді таңдау оңайға соққан жоқ», - деді Мемлекеттік сыйлықтың лауреаты, Қазақстанның еңбек сіңірген қайраткері, жазушы Әлібек Асқар.

Байқау комиссиясы бірлескен шешім арқылы «Проза», «Поэзия», «Драматургия», «Көркем фильм мен телесериал сценариі», «Балаларға арналған шығарма» атты бес аталым бойынша барлығы 16 жүлделі орын иегерін анықтады. «Бердібек Соқпақбаев атындағы арнайы сыйлықты» Шет тілдер және іскерлік карьера университетінің оқытушысы Эльмира Асанқызы иеленді.

«Менің байқауға жіберген шығармамда тәуелсіздігіміздің 30 жыл ішіндегі жеткен жетістіктері туралы студенттердің ойы диалог ретінде жазылды. Негізі саясатты әдеби тілде жеткізу қиын. Мен соны барынша қарапайым тілде жеткізуге тырыстым. Шығарманы екі күннің ішінде жазып шықтым.  Бұл мен қатысқан алғашқы байқау, сондықтан да өте керемет әсердемін. Мен үшін бұл үлкен мәртебе», - Эльмира Асанқызы.

Эльмира Асанқызы

Жалпы проза бағыты бойынша бірінші орын жазушы Әбілқайыр Қанатқа бұйырса, поэзияның үздігі Жамбыл облыстық газетінің журналисі, ақын Нұржан Қадірәлі болды. «Балаларға арналған шығарма» номинациясының жеңімпазы болып «Abai Tv» телеарнасының қызметкері Олжас Қасым атанды. Ал «Драматургия» және «Көркемфильм мен телесериал сценариі» аталымдары бойынша бірінші орын ешкімге берілген жоқ. Комиссия мүшелері бұл бағытта үздікті анықтау мүмкін болмағанын айтты.