Димаш Junior Eurovision-да бақ сынайтын Қарақатпен кездесті

Пандемияға байланысты тікелей эфир кезінде шоу жүргізушілері Польшада болады. Ал қатысушылар өнерін өз елінде отырып, бейнебайланыс арқылы ұсынады деп шешілген.

Жауапты сын алдында Қарақат Башанова ірі халықаралық байқаулардың жеңімпазы, тәжірибелі әнші Димаш Құдайбергеновпен кездесті. Жас өнерпазбен әлемге әйгілі әнші 2019 жылдан бері таныс. Ол кезде Димаштың туған қаласы Ақтөбеде Baqytty Bala байқауы өтіп, Қарақат үшінші орын иеленген болатын, деп хабарлайды dimashnews.kz.

Бүгінгі кездесу Нұр-Сұлтандағы орталық концерт залында болды. Димаш Қарақатқа қолдау білдіріп, әкесіне арналған «Forever» әніне қатысты.

«Сенің бойыңдағы талант мені тебірентті. Ол міндетті түрде басқаларды да таң қалдыратынына сенімдімін», – деп жігерлендіре түсті.

Димаш өз тәжірибесімен бөлісіп, кеңес берді. Номерді орындауда вокалдан бөлек сахналық шеберлік қажетін, жеңіске жету үшін жақсы көңіл күй де маңызды екенін айтты.  

Қарақат маңызды сын алдында Димаштың өзі дайындыққа келіп, қатысқанына қатты қуанды. Кездесуден шабыт алған өнерпаз сүйікті әншісіне қолдау білдіргені үшін алғыс айтып,  өз Отанының атынан лайықты өнер көрсетуге күш салатынын жеткізді.

Қарақатқа Димаштың қарындасы Раушан да сәттілік тіледі. Жас өнерпазға балалар Евроведениесіне қатысуға Раушан ұсыныс айтқан болатын.

Естеріңізге сала кетейік, Қарақат балалар Евровидениесіне Қазақстан атынан қатысып отырған үшінші өнерпаз. Бұған дейін Junior Eurovision байқауында Данелия Төлешова (2018 ж.) бақ сынап, алтыншы орынға ие болды. Өткен жылы бұл сынның екінші орынын  Ержан Максим жеңіп алды.