Италияның солтүстігінде қар көшкіні бес альпинистің өмірін қиды
Қар көшкіні оларды жыраның төменгі бөлігіне алып кеткен
Италияның солтүстігінде қар көшкіні германиялық бес альпинистің өмірін қиды, деп хабарлайды Azattyq Rýhy.
The Guardian газетінің мәліметінше үш адамның – екі ер адам мен бір әйелдің денесі 2025 жылдың 1 қарашасында табылды, тағы екі адамның – әкесі мен оның 17 жастағы қызының денесі 2 қарашада таңертең табылды.
Құтқару қызметінің өкілі Федерико Катанияның айтуынша, қар көшкіні оларды жыраның төменгі бөлігіне алып кеткен.
«Қайғылы оқиға сенбі күні жергілікті уақыт бойынша сағат 16:00 шамасында Ортлес тауларының Чима Вертана аймағында 3500 метрден астам биіктікке өрмелеу кезінде болды. Альпинистер неліктен кешкі уақытта тауға шығуды тоқтатпағаны әзірге белгісіз», - деп жазды басылым.
Алдын ала мәлімет бойынша альпинистер үш топқа бөлініп жүрген. Екі ер адам аман қалды, олар Больцанодағы ауруханаға тікұшақпен жеткізілді.
Трагедия болған Оңтүстік Тироль – неміс туристері үшін танымал орын. Аймақтың ең биік шыңы – Ортлес (3905 м).
Италия Альпілерінде қар көшкіні әлі де тұрақты проблема болып қалып отыр: кейінгі онжылдықта ел өлім-жітімнен әлемде көшбасшылардың қатарында болды. Мамандардың айтуынша, ски-альпинизм мен фрирайдтың танымалдығы артқан сайын жазатайым оқиғалардың саны да көбейіп келеді.
