Гаага соты тәліптердің екі лауазымды басшысын ұстауға ордер берді

Гаага Халықаралық қылмыстық соты (ХҚС) Ауғанстанда билік етіп отырған «Талибан» қозғалысының екі жоғары лауазымды жетекшісін тұтқынға алуға ордер берді. Олардың бірі - жоғарғы көшбасшы Хайбатулла Ахундзада болса, екіншісі - бас судья Абдул Хаким Хаккани, деп хабарлайды Azattyq Rýhy ВВС-ге сілтеме жасап. 

Сот оларға әйелдер мен қыздардың құқықтарын жүйелі түрде шектеу арқылы адамзатқа қарсы қылмыс жасады деген айып тағып отыр.

Тәліптер 2021 жылы Кабулды басып алған соң, әйелдердің құқығын өрескел бұзды. Қыз-келіншекке түрлі салаларда жұмыс істеуге, қоғамдық орындарда қатты сөйлеуге, 12 жастан кейін білім алуға шектеу қойды. Ер адамның қарауынсыз көшеге шығуына тыйым салды.

Халықаралық сот гендерлік сипаттағы шектеулер әйелдер мен қыздарды мақсатты түрде негізгі құқықтарынан айырғанын атап өтті.

Өз кезегінде «Талибан» сот шешімін қабылдамайтынын айтып, ордерді «дұшпандық әрекет», «мұсылмандардың сенімін қорлау» деп атады. Бұған дейін БҰҰ тәліптердың ережелерін «гендерлік апартеид» деп бағалаған болатын. Ал «Талибан» өз әрекетін ауған дәстүрлеріне сай деп түсіндіреді.

Айта кетейік, Хайбатулла Ахундзада 2016 жылдан бері «Талибан» қарулы күштерінің басшысы болса, 2021 жылы АҚШ-тың әскери күштері елден кеткен соң, «Ауғанстан Ислам Әмірлігінің» жоғарғы басшысы атанды. Ал Абдул Хаким Хаккани бұрынғы тәліптер көсемі молда Омардың сенімді серігі болды, 2020 жылы АҚШ-пен келіссөз жүргізген.