«Бұл – тарихи сәт»: Мексика мэрі қолтырауынға үйленді (ВИДЕО)

Мексиканың Сан-Педро-Уамелула қаласында 30 маусым күні ерекше және дәстүрлі үйлену тойы өтті. Қаланың мэрі Даниэль Гутьеррес тірі қолтырауынға (кайман) үйленіп, ұлттық дәстүрді ұстанды, деп хабарлайды Azattyq Rýhy.

Мұндай үйлену рәсімі - оңтүстік Мексикада ғасырлар бойы жалғасып келе жатқан салт. Жергілікті сенім бойынша, қолтырауынмен қиылған неке қалаға молшылық, береке және тыныштық әкеледі.

«Бұл - тарихи сәт. Бұл дәстүр жыл сайын қайталанады. Бұл - екі қаланы, екі мәдениетті, екі қауымды біріктіретін мереке. Мұның бәрі ортақ өркендеуге бағытталған», – деді мэр Даниэль Гутьеррес.

Айта кетейік, бұған дейін де Сан-Педро-Уамелула қаласының бұрынғы мэрі Виктор Уго Соса да дәл осындай рәсім өткізген болатын. Ол кезде де бауырымен жорғалаушыға үйлену арқылы жергілікті қауым табынушыларына құрбандық жасап, жаңбыр мен мол өнім тілеген.

Үйлену тойына қатысушылардың қауіпсіздігі үшін Алисия Адриана есімді қолтырауынның ауызы арқанмен байланған.