Қырғызстанның астанасы басқа жерге көшірілуі мүмкін

Жогорку кенеш депутаттары Бішкектегі кептеліс мәселесін шешуді ұсынды, деп хабарлайды Azattyq Rýhy.

«Мен астанамызды басқа жерге көшіруді ұсынамын. Бұл мәселені қарастыру керек. Ыстықкөл облысында Асман қаласы салынып, оған 10 миллиард сом инвестиция тартылып жатыр. Темір жолды елорданың сыртына жылжыту үшін 550 миллион доллар, ал айналма жол салу үшін 1 миллиард доллардан астам қаражат қажет. Егер астананы көшіріп, министрлер кабинетін қала сыртына көшірсе, кептеліс мәселесі шешіледі», – деді депутат Бақытбек Марипов.

Бұған дейін Бішкектегі кептеліс мәселесін шешу үшін депутат Эльмурза Сатыбалдиев Бішкек әкімдігіне оң рульді көліктерге кіруге тыйым салуды ұсынған болатын.