Норовирус: Еуропада тағы бір круиздік лайнерде вирус тарап жатыр

Бортында 1,7 мың адам болған «Ambition» туристік кемесі Францияның Бордо портында оқшауланып, айлаққа қойылды, деп хабарлайды Azattyq Rýhy.

Мұндай шешім жолаушылардың бірінің норовирус жұқтырды деген күдікпен қайтыс болуынан кейін қабылданған. Франция билігі Ambassador Cruise Line компаниясына тиесілі Ambition круиздік кемесінде карантин енгізді. Кемеде барлығы шамамен 1700 адам бар – 1233 жолаушы және экипаждың 514 мүшесі.

Сақтық шараларын енгізуге 90 жастағы британдық жолаушының қазасы себеп болған. Онда норовирус тудырды деген болжам жасалған гастроэнтерит белгілері байқалған. Жергілікті билік пен БАҚ мәліметінше, тағы 50-ге жуық жолаушы мен экипаж мүшесінде де ұқсас белгілер – құсу мен іш өту анықталған.

Кеме Бордоға 12 мамыр, сейсенбі күні жеткен. Рейс 6 мамырда Шетланд аралдарынан басталған. Лайнер Белфаст, Ливерпуль және Францияның Брест қаласына тоқтаған. Жолаушылардың басым бөлігі – Ұлыбритания мен Ирландия азаматтары. Бордодан кейін лайнер Испанияға бет алуды жоспарлаған.

Қазір Францияның санитарлық қызметтері қосымша талдау жүргізіп жатыр. Ambassador Cruise Line компаниясы кемедегі гигиеналық хаттамаларды күшейткенін хабарлады.

Тест нәтижелері шыққанға дейін жолаушыларды түсіру уақытша тоқтатылды.

Норовирус, яғни «асқазан тұмауы» өте жұқпалы инфекция саналады. Ортақ асханалар мен адамдардың тығыз байланысына байланысты мұндай індет круиздік лайнерлерде жиі тарайды. Әсіресе қосымша аурулары бар егде жастағы адамдар үшін бұл инфекция аса қауіпті болуы мүмкін.

Бұл – 2026 жылы круиздік кемелерде болған алғашқы жағдай емес. Бұған дейін де теңіз лайнерлерінде осындай індет тіркелгені хабарланған.

Оған дейін Аргентинадан Кабо-Вердеге бағыт алған MV Hondius круиздік кемесінде хантавирус өршігені белгілі болған. Инфекциядан үш жолаушы қайтыс болды.

10 мамыр күні лайнер Тенерифеге жеткеннен кейін, айлаққа тоқтаған бойда жолаушылардың бір бөлігі эвакуацияланды. Кейін кеме бортында 25 экипаж мүшесі, дәрігер мен медбике бар күйде Нидерландыға жол тартты. Лайнер 17 мамырға қарай Нидерландыға жетеді деп күтіліп отыр.