Трамп әзірге Иранмен 45 күндік бітім жоспарын мақұлдамады – CNN
АҚШ-тың Ирандағы әскери әрекеті жалғасып жатыр
Иран төңірегіндегі қақтығысты тоқтатуға күш салып жатқан елдер 45 күндік бітім жоспарын әзірледі. Құжатта әлемдік мұнай жеткізілімі үшін аса маңызды Ормуз бұғазының жұмысын қайта жандандыру да қарастырылған, деп хабарлайды Azattyq Rýhy.
CNN мәліметінше, құжат жексенбі күні түнге қарай АҚШ пен Иранға жолданған. Ол жағдайдың одан әрі күрт ушығуына жол бермеуге бағытталған соңғы қадамдардың бірі ретінде қарастырылып отыр.
Бұған дейін Дональд Трамп Ормуз бұғазының бұғатталуы жалғасса, АҚШ Иранның электр станциялары мен өзге де инфрақұрылым нысандарына жаппай соққы жасауы мүмкін екенін ескерткен еді.
Алайда Ақ үй бұл жоспарға қатысты әзірге сақ позиция ұстанып отыр. Әкімшілік өкілдерінің бірі Трамптың бұл бастаманы әлі қолдамағанын жеткізді.
«Бұл – ұсынылған көптеген идеяның бірі ғана», – деді АҚШ әкімшілігінің өкілі.
Сонымен қатар оның айтуынша, АҚШ-тың Иран аумағындағы әскери операциясы жалғасып жатыр.
Бүгін Шығыс жағалау уақытымен сағат 13:00-де Дональд Трамп Ақ үйде баспасөз мәслихатын өткізіп, осы жағдайға қатысты пікір білдіреді деп күтіліп отыр.
Көп оқылған
