Теміртауда қылмыс жасаған: күдікті 12 жылдан кейін БАӘ-ден Қазақстанға қайтарылды
Ол 2012 жылы Теміртауда адамға себепсіз қиянат жасаған
Қазақстан Республикасының бас прокуратурасы мен ішкі істер министрлігінің қызметкерлері, сондай-ақ Біріккен Араб Әмірліктеріндегі Қазақстан елшілігінің қолдауымен, құқық қорғау органдарының қызметкерлері Дубай қаласынан 12 жылдан бері іздеуде жүрген күдіктіні елге қайтарды, деп хабарлайды Azattyq Rýhy.
Ол 2012 жылдың 25 наурызында Теміртауда хулигандық себептермен азаматқа орташа ауырлықтағы дене жарақатын келтірді деген күдікке ілінген.
Тергеу деректеріне сәйкес, күдікті жәбірленушіге еш себепсіз шабуыл жасап, екі жерден жақ сүйегін сындырған. Қылмыстан кейін күдікті ел аумағынан бой тасалап, ұзақ уақыт халықаралық іздеуде болған.
Тек 2024 жылы ол БАӘ аумағында ұсталып, Қазақстанның сұранысы бойынша экстрадициялау рәсімі жүргізілген.
Қазіргі таңда күдікті Қазақстанға жеткізіліп, тергеу органдарына тапсырылды. Ол енді Қылмыстық кодекстің тиісті бабы бойынша жауапқа тартылады.
Бұл іс бойынша Бас прокуратура, Ішкі істер министрлігі, Сыртқы істер министрлігі және Қазақстан елшілігі ортақ әрекет етіп, көпжылдық іздеуді сәтті аяқтауға мүмкіндік берді.
