Ол бұл титулды оныншы рет алды
Қазақстандық теннисші Елена Рыбакина мансабындағы оныншы WTA титулын иеленіп, ел тарихында осындай жетістікке жеткен алғашқы спортшы атанды, деп хабарлайды Azattyq Rýhy.
Қытайдың Нинбо қаласында өткен WTA-500 сериялы турнирдің финалында әлемнің 9-ракеткасы Елена Рыбакина ресейлік Екатерина Александровамен (10-орын) кездесті.
Тартысты өткен матч үш сетке созылып, қазақстандық спортшы 3:6, 6:0, 6:2 есебімен жеңіске жетті.
Бұл жеңіс Елена Рыбакинаға мансабындағы 10-шы WTA титулын сыйлады. Оның ішінде: екі WTA 1000 турнирінің трофейі және Уимблдондағы «Үлкен дулыға» жеңісі бар.
«Бұл жеңіс мен үшін ерекше. Әрбір титулдың өз тарихы бар, бірақ оныншы — символикалық мәнге ие. Маусымның азиялық кезеңін осылай аяқтағаныма қуаныштымын», – деді Рыбакина матчтан кейін.