Бұл Чемпиондар лигасындағы сәтсіздіктен кейінгі шешім
Түркияның «Фенербахче» футбол клубы бас бапкері Жозе Моуриньомен келісімшартты тоқтатты. Бұл туралы клубтың баспасөз қызметі әлеуметтік желіде хабарлады, деп хабарлайды Azattyq Rýhy.
27 тамыз күні «Фенербахче» Чемпиондар лигасының плей-офф кезеңінде португалиялық «Бенфикадан» жеңіліп, турнирден шығып қалған болатын. Осыдан кейін клуб жаттықтырушымен қоштасу туралы шешім қабылдады.
«Біз 2024/2025 маусымынан бері командамыздың бас бапкері болған Жозе Моуриньомен қоштасу туралы шешім қабылдадық. Клуб Моуриньоның қосқан үлесіне алғыс білдіреді және оған алдағы карьерасына табыс тілейді», – делінген «Фенербахче» баспасөз қызметінің хабарламасында.
Әлемге әйгілі маман бұған дейін «Реал Мадрид», «Челси», «Интер», «Тоттенхэм», «Рома» секілді топ-клубтарды жаттықтырған. Ол Еуропаның ең беделді бапкерлерінің бірі саналады.