«Шамам жеткенше күрестім»: Айдос Сұлтанғали олимпиададағы жеңілісі туралы пікір білдірді

Грек-рим күресінен Қазақстан командасының мүшесі Айдос Сұлтанғали Олимпиаданың алғашқы айналымында жеңілді. Белдесуден соң сұхбат берген спортшы кілемде барын салғанын айтты, деп хабарлайды  Azattyq Rýhy Olympic.kz-ке сілтеме жасап. 

«Қарсыласым әлемдегі нөмірі бірінші балуандардың қатарында. Оған әрі қарай сәттілік тілеймін. Егер ол финалға шықса, жұбаныш белдесулері арқылы қола медальға үміт етеміз. Кілемде қырғын болды, барымды салдым. Алғашқы екі ұпайды алып тастайтынын да білдім. Себебі, ол өзі аяғыма отырғандай болды. Сондықтан, әрі қарай әдіс істесем, бәрібір артқы камерадан қарап, шегеріп тастайтын еді. Бапкерлерімнің тактикасымен шамам жеткенше күрестім. Ал қалай өз күресіме салдым, солай ұпай алды қарсыласым. Енді Жоламанның финалға жетуін тілеймін», - деді Сұлтанғали. 

Айдос Сұлтанғали грек-рим күресінен 60 келі салмақта сынға түсіп, 1/8 финалда қырғызстандық Жоламан Шәршенбековке есе жіберді.