Токио-2020: Абылайхан Жүсіпов бірінші жекпе-жегінде жеңіліп қалды

Токиода өтіп жатқан жазғы Олимпиада ойындарында 69 келіге дейінгі салмақ дәрежесінде өнер көрсеткен қазақстандық боксшы Абылайхан Жүсіпов америкалық қарсыласы Деланте Джонсоннан жеңіліп қалды.

Алғашқы раундта 5 төрешінің үшеуі Абылайханның басымдығын көрсеткен. Алайда, екінші раундта бес төреші де ұпайды америкалық боксшыға жазса, соңғы үшінші раундта Жүсіповті тек бір төреші ғана қолдады. Нәтижесінде 1:4 есебімен Деланте Джонсон жеңіске жетті.

Еске салайық, 69 келі салмақ дәрежесінде сынға түскен қазақстандық боксшылар соңғы төрт Олимпиадада тұғырдан көрініп, алтын медаль алған еді. 2004 жылы Афиныда - Бақтияр Артаев, 2008 жылы Бейжіңде - Бақыт Сәрсекбаев, 2012 жылы Лондонда - Серік Сәпиев, 2016 жылы Риода Данияр Елеусінов Олимпиада чемпионы атанды.