«Той болады»: Бибісара Асаубаеваның болашақ жарының атасы олардың құпиясын ашты

Өзбекстандық гроссмейстер Жавохир Синдаровтың отбасы оның қазақстандық шахматшы Бибісара Асаубаевамен қарым-қатынасын қолдайды. Спортшының атасы Комил Синдаров немересіне Бибісараны не себепті лайықты жар деп санайтынын айтты, деп хабарлайды Azattyq Rýhy.

Комил Синдаровтың айтуынша, шахматшылар бала кезінен таныс. Олар жарыстарға бірге барып, уақыт өте келе балалық достықтары махаббатқа ұласқан.

Өзбекстандық журналист Олимжон Усаровтың подкастында ол отбасының Жавохирдің таңдауын толық қолдайтынын және жастарға ақ батасын беруге дайын екенін айтқан.

«Үйлену тойы болады. Біз бұл некеден көп үміт күтеміз», – деді Комил Синдаров.

Ол қазақстандық шахматшыға жоғары баға беріп, оның жетістіктерін атап өтті.

«Біздің Бибісара – Қазақстанның мақтанышы. Ол – әлем чемпионы, гроссмейстер», – деді ол.

Атасының пікірінше, спортшылар үшін ортақ кәсіби ортаның болуы өте маңызды. Жавохир турнирлерге байланысты жылдың басым бөлігін сапарда өткізетіндіктен, болашақ жары оның өмір салтын түсінуі керек. Ал кәсіби шахматшы Бибісара тұрақты сапарлардың ерекшеліктерін жақсы біледі.

«Егер Жавохирді шахматты түсінбейтін қызға үйлендірсек, бұл қиындық тудыруы мүмкін», – деп түсіндірді ол.

Атасы болашақ чемпиондарды армандайды

Шахматшының атасы болашақта бұл жұптан талантты чемпиондар дүниеге келеді деп үміттенетінін айтты. Сондай-ақ олардың одағы Қазақстан мен Өзбекстанның одан әрі жақындасуына ықпал етеді деп санайды.

Ол Бибісараның Ташкентке қоныс аударуы мүмкін екеніне де пікір білдірді. Оның ойынша, бұл Өзбекстандағы шахматтың дамуына жаңа серпін беруі мүмкін. Дегенмен Комил Синдаров тұрғылықты жерді таңдау болашақ ерлі-зайыптылардың өз шешімі екенін атап өтті.

Үйлену тойы қашан өтеді?

Қазір жұп үйлену тойын өткізуге асықпайды. Жавохирдің басты мақсаты – қазіргі әлем чемпионы Гукеш Доммараджумен өтетін әлем чемпионы атағы үшін матчқа дайындалу. Кездесу Женевада 2026 жылғы 22 қараша мен 12 желтоқсан аралығында өтеді.

Бибісара Асаубаева да халықаралық турнирлерге қатысуын жалғастырып жатыр. Қазақстандық шахматшы блиц бойынша әлем чемпионы атағын үш рет – 2021, 2022 және 2025 жылдары жеңіп алған.