«Қаңғыбас»: танымал боксшы допинг дауынан кейін Жәнібек Әлімханұлын келемеждеді
2022 жылы қос боксшы WBO әлем чемпионы атағы үшін жұдырықтасқан болатын
Жәнібек Әлімханұлынан жеңілген британиялық боксшы Дензел Бентли қазақстандық спортшының допинг дауына іліккені туралы жаңалыққа дөрекі пікір білдірді, деп хабарлайды Azattyq Rýhy.
Допинг дауы туралы ақпарат шыққаннан кейін Бентли X әлеуметтік желісінде жағдайды белсенді түрде талқылай бастады. Ол қолданушылардың бірнеше сын пікірін бөлісіп, өзі де өткір жазбалар қалдырды.
Жазбалардың бірінде Бентли Әлімханұлын балаларды қорқытатын кейіпкер – «бугименге» теңеген.
«Құрып кеткір, мынау жалған бугимен допинг сынағынан өте алмай қалыпты», – деп жазды ол.
Басқа жазбасында британиялық боксшы қазақстандық спортшыны «қаңғыбас» деп атаған.
Еске сала кетейік, 2022 жылы қос боксшы WBO әлем чемпионы атағы үшін өткен жекпе-жекте кездесті, онда Әлімханұлы судьялардың бірауыздан шешімімен жеңіске жетті.
