Өз жазбасында ол бірнеше алаяқтық факті тіркелгенін айтқан
Мәжіліс депутаты, «AMANAT» фракциясының мүшесі Болатбек Әлиев Шымкентте соңғы 3 жылда берілген барлық электронды цифрлы қолтаңбаларды, әсіресе шет ел азаматтарына берілген электронды цифрлы қолтаңбаларды тексеруді сұрады, деп хабарлайды Azattyq Rýhy.
Депутат әлеуметтік желідегі парақшасында бұндай мәселе көтерудің бірнеше себебін атады.
«Соңғы айларда Шымкент қаласында «Азаматтарға арналған үкімет» жүйесіне қатысты бірнеше даулы және қоғамда үлкен резонанс тудырған деректер анықталды. Бірі – әлеуметтік төлемдерді ұрлау, екіншісі – жүргізуші куәліктерін заңсыз сату, үшіншісі шетелдік азаматтың атына рәсімделген электрондық қолтаңба. Барлық бұл фактілер бір орталыққа - Шымкенттегі филиалдың бақылау мен жауапкершілік жүйесіне барып тіреледі. Әлеуметтік төлемдерді ұрлау схемасы. Кеше ғана Шымкентте жалған жұмысқа орналастыру арқылы жүкті әйелдердің атына әлеуметтік төлемдерді заңсыз алу схемасы әшкереленді. Тергеу мәліметінше, айыпталушы жалған еңбек келісімдері мен бөгде тұлғалардың ЭЦҚ-сын пайдалана отырып төлемдерді алып келген. Олар кімдердің қолтаңбасы, кім көмектескен соларға ие болуға? Мемлекетке келтірілген зиян көлемі – 217 миллион теңге. Бұл оқиға кездейсоқ емес. Өйткені ЭЦҚ рәсімдеу және верификация процестері — дәл осы «Азаматтарға арналған үкімет» жүйесі арқылы өтеді. Яғни мұндай көлемдегі алаяқтық ішкі бақылау тетігінің істен шыққанын көрсетеді», - дейді депутат.
Ол сондай-ақ, жүргізуші куәлігін сатуға қатысты да фактілер осы ЭЦҚ арқылы жасалған дейді. Оның айтуынша, бірнеше ай бұрын дәл сол Шымкентте жүргізуші куәліктерін заңсыз сату фактісі бойынша ірі қылмыстық іс қозғалған еді. Агенттіктің ресми ақпаратына сәйкес, 500-ден астам адам емтихан тапсырмай-ақ куәлік алған. «Қызметтің» құны – 150–400 мың теңге, ал ұйымдасқан топтың табысы 150 миллион теңгеден асқан. Бұл жағдай да дәл сол жүйенің ішінде орын алған. Бір жерде – ЭЦҚ арқылы әлеуметтік төлемдер ұрланып жатса, екінші жерде – жүргізуші куәліктері ақылы түрде «сатылып» келген.
«Демек, мәселе - жеке қызметкерлерде емес, бақылау мен басқару жүйесінің әлсіздігінде. ЭЦҚ шетелде жүрген адамның атына берілген. Ең сорақысы – ресми тергеуде көрсеткендей, Шымкент филиалында шетелде жүрген тұлғаның атына электрондық цифрлық қолтаңба (ЭЦҚ) рәсімделген, және бұл ЭЦҚ кейін Қазақстан аумағында белсенді пайдаланылған», - деп жазады ол.
Депутат атап өткендей, осының бәрі бір өңірлік құрылымда – Шымкенттегі «Азаматтарға арналған үкімет» филиалында болып отыр.
«Сонда сұрақ туындайды: Филиал директоры бұл процестерді басқарып отыр ма, әлде жағдай толықтай бақылаудан шығып кеткен бе? ЭЦҚ иесінен тыс рәсімделіп, әлеуметтік төлемдер ұрланып, жүргізуші куәліктері сатыла бастаса - бұл енді жеке кемшілік емес, жүйелі басқарушылық дағдарыс. Не істеу керек?», - деп мәселенің шешімін іздеген депутат болашақта мынандай ұсыныстар қозғайтынын айтқан.
«Азаматтарға арналған үкімет» халық сенімін ақтағысы келсе бақылау мен қауіпсіздік қағидаты формалды емес, нақты тетікке айналуы керек. Қазір мәселе жүйеде емес, сол жүйені басқарып отырған адамдардың кәсібилігі мен бақылау қабілетінде. Осы деректер мен фактілердің барлығы бойынша мен Үкімет басшылығына депутаттық сауал жолдаймын. Сауалда Шымкент қаласындағы филиалда анықталған жүйелі бұзушылықтар, ЭЦҚ рәсімдеу кезінде жіберілген заңсыздықтар, әлеуметтік төлемдер мен жүргізуші куәліктеріне қатысты тергеу нәтижелері жан-жақты қаралуы тиіс. Мақсат – кінәлілерді ғана емес, жүйелік әлсіздікті анықтап, оны түбегейлі жою»,- дейді депутат.