Президенттің пікірінше, жасанды интеллект көп нәрсені автоматтандыра алады
Бүгін Жасанды интеллектіні дамыту жөніндегі кеңестің алғашқы отырысын өткізген президент Қасым-Жомарт Тоқаев ЖИ-ді қай жерде ұтымды пайдаланып, қай жерде одан абай болу керек екенін түсіндірді, деп хабарлайды Azattyq Rýhy.
Айта кетейік, бүгін президент Қазақстанда жасанды интеллект университет ашуды тапсырды. Енді құзырлы мекемелер сол университеттің көмегімен оқушылардың цифрлық профильдерін қалыптастыруға болады дейді ол.
«Онда әр баланың оқу үлгерімі, мықты қырлары мен жетістіктері тіркеледі. Ал бұл, өз кезегінде, университет бағдарламасын оңтайландырып, жоғары оқу орнын мерзімінен бұрын тәмамдауға мүмкіндік береді. Бұдан бөлек, жасанды интеллект цифрлық профиль негізінде кәсіптік бағдар жүйесін жасақтайды. Оқушыларға қарым-қабілетіне сай даму жолдары, курстар мен жобаларды таңдау еркіндігі ұсынылуы керек. Бұл болашақ инженерлерді, зерттеушілерді, дәрігерлерді, мұғалімдер мен кәсіпкерлерді алдын ала анықтауға жол ашады. Осылайша, әрбір адам өз қабілетін пайдаланып, өмірден лайықты орнын табады. Үкіметке жаңа ЖИ университетімен интеграцияланған оқушылардың ұлттық цифрлық профильдер жүйесін құруды тапсырамын», – деді Мемлекет басшысы.
Сондай-ақ Тоқаев мұғалімдер көп уақытын жұмсайтын күнделікті күйбең шаруаны жасанды интеллект арқылы автоматтандыруға болар еді дейді. Бұл ретте ол мұғалім мен оқушы арасындағы адами байланысты ешбір автомат алмастырмауы керек екенін баса айтты.
«Алгоритмдер шәкірттерге жеке тапсырмалар мен дайындық тесттерін әзірлеп, жауаптарды тексеріп, олармен жылдам кері байланыс орната алады. Мұндай технологиялық шешім мұғалімдердің жұмысын едәуір жеңілдетіп, ұстаздық қызметімен айналысуына мүмкіндік береді. Бірақ бір нәрсе әрдайым есте болуға тиіс: мұғалімнің жанашырлығын және ақыл-парасатын ешбір технология алмастыра алмайды. Сондықтан мұғалім мен оқушы арасындағы адами қарым-қатынас білім беру үдерісінің өзегі болып қалуға тиіс. Біздің мақсатымыз – педагогтерді басы артық жұмыстан босату, өз миссиясын алаңсыз атқаруына жағдай жасау. Үкімет жасанды интеллектіні білім беру жүйесіне енгізген кезде осы қағиданы ескеруі керек», – деді Тоқаев.