80 адам арнайы әлеуметтік көмекті үй жағдайында алып отыр
Петропавл қаласында әлеуметтік саясаттың негізгі бағыты ретінде мүмкіндігі шектеулі азаматтарды жан-жақты қолдау және олардың қоғамға толыққанды араласуына жағдай жасауға басымдық беріліп отыр. Соңғы жылдары әкімдік осы бағытта жүйелі жұмыс жүргізіп, инклюзивті қоғам құруға ерекше назар аударуда. Ресми деректерге сүйенсек, 2025 жылғы 1 қыркүйектегі жағдай бойынша қалада 1912 мүмкіндігі шектеулі жан тіркелген. Олар 4087 түрлі құралдар мен қызметтермен қамтамасыз етілген, ал 80 адам арнайы әлеуметтік көмекті үй жағдайында алып отыр, деп жазады Azattyq Rýhy.
Бұл қолдау кешенді сипатқа ие. Мысалы, азаматтар протездік-ортопедиялық көмек алады, арбалар, тифло- және сурдотехникалық құралдар, міндетті гигиеналық өнімдермен қамтылып отыр. Сонымен қатар, бірінші топтағы мүгедектігі бар адамдарға жеке көмекшілер мен ым-ишара тілін меңгерген мамандар қызмет көрсетеді. Әлеуметтік төлемдер де заңға сәйкес уақытылы төленуде: І топтағы азаматтарға – 101 701 теңге, ІІ топқа – 81 364 теңге, ІІІ топқа – 55 473 теңге беріледі. Ал балалар үшін жәрдемақының мөлшері 74 мыңнан 101 мың теңгеге дейінгі аралықты құрайды. Оларды күтіп отырған ата-аналарға да қосымша төлемдер қарастырылған, мысалы, күтім жәрдемақысы 74 428 теңге.
Қала әкімдігі әлеуметтік қорғау жүйесінің ашықтығы мен қолжетімділігіне де көңіл бөлген. Тұрғындар әкімдіктің ресми сайты немесе iKomek 109 бірыңғай байланыс орталығы арқылы өтініш беріп, қажетті қызметтерге жылдам қол жеткізе алады. Бұл цифрлық форматтағы шешімдер ерекше қажеттілігі бар адамдар үшін кедергілерді азайтты.
Материалдық көмекпен қатар қоғамдағы көзқарасты өзгертетін бастамалар да іске асуда. Әкімдік патерналистік және масылдық көңіл-күйді азайтуға, өзара құрмет пен теңдік құндылықтарын нығайтуға бағытталған жобаларды қолдап отыр. Осы мақсатта қоғамдық ұйымдар, жастар бірлестіктері мен еріктілер белсенді тартылады. 2024–2025 жылдары Петропавлда мүмкіндігі шектеулі жандардың қатысуымен спорттық жарыстар, қолөнер және мәдени көрмелер ұйымдастырылды. Қалада олардың шығармашылық әлеуетін дамытуға жағдай жасалған.
Инфрақұрылым да жайлап бейімделіп келеді. Қаладағы әлеуметтік мекемелер мен жаңа ғимараттарда пандустар орнатылуда, ал қоғамдық көліктердің бір бөлігі арба пайдаланушыларға бейімделген. Әрине, барлық ғимараттарда қолжетімділік біркелкі емес, қоғамдық көліктің толықтай бейімделуі де уақытты қажет етеді, дегенмен әкімдік кәсіпкерлерді, құрылыс компанияларын және қоғамдық ұйымдарды тарта отырып, бұл мәселелерді шешу үшін нақты шараларды қолға алған.
Осылайша, Петропавлда әлеуметтік қолдау жүйесі жәрдемақылармен шектелмей, оңалту қызметтері, инфрақұрылымдық бейімдеу және қоғамдық көзқарасты өзгертуге бағытталған кешенді жұмыстарды қамтып отыр. Қалада мүмкіндігі шектеулі жандардың қоғамға еркін араласуына жағдай жасалып, оларға құрметпен қарау мәдениеті қалыптасып келеді.