Алтынсарин атындағы академия жаңа оқу жылындағы жаңалықтарды жариялады

Ыбырай Алтынсарин атындағы Ұлттық білім академиясы жаңа 2025–2026 оқу жылының басталуына орай дәстүрлі Әдістемелік-нұсқау хатты педагогтерге, әдіскерлерге және мектеп басшыларына ұсынды, деп хабарлайды Azattyq Rýhy академияның баспасөз қызметіне сілтеме жасай отырып.

Академия президенті Нәзипа Аюбаеваның мәлімдеуінше, биылғы құжаттың басты мақсаты – білім сапасын арттырумен қатар, тәрбие мен құндылықтарды сабақтастыру, цифрлық дәуір талаптарына сай дағдыларды дамыту және әр баланың ерекшелігін ескере отырып қолдау көрсету.

«Адал азамат» бағдарламасы барлық пән мазмұнына кіріктіріліп, оқушылардың бойына адалдық, жауапкершілік, еңбексүйгіштік сияқты қасиеттерді дарытуға бағытталады. Сонымен қатар, маңызды бағыттардың бірі – Жасанды интеллектіні сабақ барысында қолдану. Бұл мұғалімдерге оқушылардың жеке деңгейіне сай тапсырма ұсынуға, оқу материалын түрлендіріп түсіндіруге, оқу траекториясын құруға мүмкіндік береді.

Барлық пәндерде функционалдық сауаттылықты арттыруға ерекше назар аударылмақ. Мысалы:

•  Математикада – логикалық ойлау,
•  Жаратылыстануда – тәжірибелік зерттеу,
• Тілдерде – медиасауаттылық,
• Тарихта – сыни ойлау дағдылары күшейтіледі.

Бұл бағыттар оқушыларды өмірде нақты қолдана алатын біліммен қамтамасыз етуге арналған.

Зерттеу мен жобалық жұмыстар оқушылардың шығармашылығын, дербестігін және топпен жұмыс істеу қабілеттерін дамытуға ықпал етеді.

Жаңа оқу жылының негізгі ерекшеліктері:

•  1-сыныптарда оқу жылы – 33 апта, 2–11(12)-сыныптарда – 34 апта;
•  «Келешек мектебі» және «Ауыл мектебі – сапа алаңы» жобалары жалғасады;
•  «Жұмысшы мамандықтар жылы» аясында бейіндік сыныптар ашылады;
•  Әр мектепте профориентатор-педагог жұмыс істеп, балаларға ерте кәсіптік бағдар беруге көмектеседі;
•  Педагогтерді аттестаттаудың жаңа ережелері қолданысқа енгізіледі.

Академия президенті Нәзипа Аюбаева педагогтерді жаңа оқу жылындағы маңызды бағыттармен Тамыз конференциясында және өңірлік педкеңестерде таныстырғанын атап өтті.

«Әдістемелік-нұсқау хат – ұстаздарға жол көрсететін сенімді құрал болады деп сенеміз. Жаңа оқу жылы білім беру сапасын арттырып, жас ұрпақтың болашағына сенімді бағдар беруге жол ашады», – деді Нәзипа Аюбаева.