Жобаның мақсаты – қоғамда кітап оқу мәдениетін қалыптастыру және кітап оқуға деген қызығушылықты арттыру
Қостанай облысының әкімі Құмар Ақсақалов «AMANAT» партиясының бастамасымен қолға алынған «Кітап оқитын ұлт» пилоттық жобасы жайлы ой бөлісті. Әкім аталмыш жобаға Қостанай өңірінің тұрғындары қатысатынын ерекше айтып өтті, деп хабарлайды Azattyq Rýhy.
«Кітап оқитын ұлт» жобасы аясында Қостанай облысында оқырмандар клубтары құрылып, талқылау кештері өтеді.
«Құрметті достар! Баршаңызға мәлім мемлекет басшысы Қасым-Жомарт Тоқаев Атырауда өткен ІІІ Ұлттық құрылтайда сөйлеген сөзінде прогрессивті ұлтқа айналу үшін кітапты бала кезден бастап оқуға дағдылану қажеттігін атап өтті.
Бұл расында өзекті мәселе. Жақында ҚР Парламенті Мәжілісінің төрағасы, «AMANAT» партиясының төрағасы Ерлан Жақанұлы Қошанов «Кітап оқитын ұлт» пилоттық жобасы бастау алғанын жариялады. Аталған жоба өтетін аймақтар тізімінде Қарағанды облысы мен Шымкент қаласымен қатар біздің өңірдің де болуы қуантады және ол заңдылық деп білемін.
Өз даласында Ыбырай Алтынсарин, Ахмет Байтұрсынұлы, Міржақып Дулатұлы сынды ұлы тұлғаларды тербеген қасиетті Қостанай облысында халқымыздың зейінін ашып, білімін шыңдауға бағытталған ауқымды жобаның өтуі орынды», – Құмар Ақсақалов.
Жобаның мақсаты – қоғамда кітап оқу мәдениетін қалыптастыру және кітап оқуға деген қызығушылықты арттыру.
Айта кетерлігі, жоба мектеп оқушылары, колледж және университет студенттері, педагогтер, отбасылық әулеттер мен мемлекеттік қызметшілердің әрқайсысының санатына сәйкес «Кітап оқитын мектеп», «Кітап оқитын колледж», «Кітап оқитын университет», «Кітап оқитын педагог», «Кітап оқитын әулет» және «Кітап оқитын мемлекеттік қызметкер» аталымдары бойынша байқаулар сериясынан тұрады.
Жоба қатысушыларына арнап жауапты министрліктер мен түрлі сала сарапшыларының қатысуымен қазақ тілінде және орыс тілінде 150 кітаптан іріктелді. Аталған кітаптың ішіне «100 кітап» атты Жалпыұлттық сауалнама нәтижесінде таңдалған 43 кітап енгізілген. Олардың ішінде – Абай Құнанбайұлының қара сөздері, Мұхтар Әуезовтың «Абай жолы», Міржақып Дулатовтың «Бақытсыз Жамал» романы және Әбдіжәміл Нүрпейісовтің «Қан мен тер» сынды еңбектерін ерекше атап өтуге болады.
Қатысушылар әр аталым бойынша 15 кітаптан оқуы тиіс. Ерекше айта кетерлігі, «Кітап оқитын мектеп» аталымында 75 кітап бөлінген. Мұның себебі, әр сыныпқа 15 кітаптан қарастырылған.
Байқау жеңімпаздары қомақты қаржылай сыйлықпен марапатталады.
Жоба «AMANAT» партиясының қолдауымен, «Кітап оқитын ұлт – читающая нация» қоғамдық қорымен бірлесе жүзеге асырылады.
«Құрметті достар! Бұл жоба әрбір оқырманның сыни ойлауын, ой-өрісін және зияткерлік әлеуетін дамытуға үлес қосатынына сенімдімін. Кітап – түбі шексіз алтын сандық. Ендеше білім әлемінің байлығына бірге ентелей енуге шақырамын. Байқауға қатысушылардың бәріне сәттілік тілеймін!» – деп жазды Қостанай облысының әкімі.