Мобильді скрининг орталығы 5 маусымда ашылды
Елордадағы коронавируске анализ тапсыру пунктіне келушілердің қарасы қалың. Адамдар сағат 10-да ашылатын орталық алдында таңғы 6-7-ден бастап кезекке тұрып жатыр. Ал тест алып жатқан медициналық қызметкерлер көп емес. Төлем жасайтын 1 ғана касса бар. Azattyq Rýhy ЭКСПО ғимараты маңында орналасқан пункттен фоторепортаж ұсынады.
Тұрғындардың көбі ерте келіп алған. Соның өзінде кем дегенде, алдында тұрған 20-30 адамды күтуге тура келеді. Орталық 1 күнде 100-ден артық тест ала алмайды. Көпшілігі медициналық маска киген.
Дегенмен, касса маңында әлеуметтік арақашықтық сақталмайды. Осыған қатысты кейбір адамдар келіспеушілік танытып, шу да шығарды. Тест тапсыру құны – 10 мың теңге.
Анализ пунктіне жеке көлікпен кіріп, салоннан шықпай да тест тапсыруға мүмкіндік жасалған. Мына тұрған жекеменшік күзет компаниясының өкілдері ұжыммен келген сияқты.
Азаматтардың көбінен жұмыс орындары тест нәтижесін талап еткеннен кейін келген. Кейбіреулерінің анализіне ақшаны жұмыс беруші төлесе, біразы өз қалтасынан қаржы шығаруға мәжбүр. Олар – қайда қызмет ететіндерін айтудан бас тартты.
Назарбаев университетінде жұмыс істейтін Айтбай атты азаматтың кезекте тұрғанына 3 сағаттан асыпты. Оған тест ақшасын төлеп отырған – компания.
«Бізде медициналық персонал көп қой. Ал мұнда бір қызметкер 200 адамды қабылдап жатыр. 4-5 үстел қойса болады ғой. Мен таңғы сағат 8-де келдім. Жұмыс беруші өзіміздің және айналадағылардың қауіпсіздігі үшін тапсыруымызды талап етті. Ақшасын өздері төледі... Ауыру маңдайымызға жазылса, ауырамыз. Басқа қайтеміз?!», - деп айтты ол.
Қала тұрғыны Қабден Зәкіш кезектің реттелмегеніне шағым білдірді.
«Мен келгелі 1 сағат болды. Бірақ сағат 6-дан бері тұрмыз деген жұрттың жанайғайын естіп жатырмыз. Бәрі сарылып күтіп тұр. Жалғыз-ақ касса істейді. Тағы 1-2 касса қойып, мәселені шешуге болар еді ғой. Жұмыс бойынша Өскеменге кетуіміз керек. Соған тест нәтижесі керек», - деді ол.
«Туыстарыммен таңғы 9:40-та келгенбіз. Аздап суық тигізіп алдым. Сондықтан сау екеніме көз жеткізу үшін, айналаға қауіп төндірмес үшін тест тапсырмақпын. Қанша керек, сонша күтеміз», - деді тағы бір тұрғын.
2-ші қалалық аурухана базасындағы мобильді скрининг орталығы күн сайын сағат 10-нан 16:00-ге дейін жұмыс істейді.
«Мобильді орталықтың қуаты күніне 100-ден астам тесті құрайды. Бір адамға процестің ұзақтығына 3-5 минут кетуі мүмкін, бұл дәстүрлі скринингке жұмсалатын процестің үштен бір бөлігі. Ыңғайлы жүйе, ең алдымен, басқа тест тапсыруға ниеттенгендермен тығыз байланыс жоқ, физикалық кезек жоқ, бәрі өз автокөлігінде жүреді”, - деп жазылған қалалық Денсаулық сақтау басқармасының хатында.
Тест нәтижесі 6 сағаттан соң шығады.
Абай Сейфулла, Нұр-Сұлтан