Жұбайының келісімінсіз несие беру: Қаржы нарығын реттеу агенттігі түсініктеме берді

Қолданыстағы заңнамаға сәйкес, жұбайының келісімінсіз кепілсіз тұтынушылық кредит беру мүмкін емес. Егер несие бәрібір де рәсімделсе, банк заңды бұза отырып берілген кредиттің күшін жоюға міндетті. Бұл туралы Қаржы нарығын реттеу және дамыту агенттігі айтты, деп хабарлайды Azattyq Rýhy.

Ерлі-зайыптының біреуі жұбайының рұқсатсыз несие алғанын біліп қойса, ол мұндай міндеттемелерді даулауға құқылы. Ал қаржы ұйымы белгіленген тәртіпті бұза отырып берілген несиенің күшін жоюға міндеттеледі.

«Бұл құқықтық норма ерлі-зайыптылардың мүліктік құқықтарын қорғауға және қаржылық міндеттемелерді ресімдеу кезінде теріс пайдаланудың алдын алуға бағытталған», - деп атап өтті агенттік.

Егер несие келісімсіз рәсімделген жағдайда кезең-кезеңмен әрекет ету қажет:

Біріншісі – кредиттің сомасы мен талаптарын нақтылаңыз.

Тиісті банкке немесе микроқаржы ұйымына хабарласып, кредит сомасын, алынған күні мен кредит шартының көшірмесін сұратыңыз. Жұбайыңыздың атынан мұндай ақпаратты алу үшін нотариаттық сенімхат ресімдеу қажет.

Екіншісі – қаржы ұйымына өтініш жазыңыз.

Кредиттің сіздің келісіміңсіз және отбасының мүддесі үшін алынбағаны туралы жазбаша өтініш жазыңыз. Қаржы ұйымы бұл хатқа жазбаша жауап беруге міндетті. Егер қарыз шынымен де сіздің келісіміңсіз рәсімделгені расталса, кредиттің күші жойылады.

Үшіншісі – құқығыңызды қорғау үшін арызданыңыз.

Егер сіздің құқықтарыңыз бұзылса, қаржы ұйымына, сондай-ақ банк омбудсманына шағымданыңыз. Егер олардың жауабы немесе шешімі сізді қанағаттандырмаса, сіз Қаржы нарығын реттеу және дамыту агенттігіне өтініш бере аласыз. Өтінішке қаржы ұйымы жауабының көшірмесін, сондай-ақ растайтын құжаттарды қоса ұсыну қажет.

Өтінішті «E-Otinish» порталы, Қазпошта арқылы немесе Алматы қаласы, «Көктем-3» шағынауданы, 21 үй мекенжайы бойынша қолма-қол беруге болады.

Заңға сәйкес, агенттік жұбайының келісімінсіз қарыз беру тәртібін бұзған кредиторға қатысты қадағалап ден қою шараларын қолдануға құқылы.

Айта кетері, ерлі-зайыптыларға жалпы сомасы 1000 АЕК-тен (3 932 000 теңге) асатын кепілсіз тұтынушылық несие (микрокредит) алар кезінде міндетті түрде жұбайының келісімі қажет болады. Егер жұбайы қосалқы қарыз алушы болса немесе несие сол банктегі қарызды қайта қаржыландыру үшін қажет болса, мұндай келісім талап етілмейді.