Үш ауылдың арасындағы жолды жөндеуге 35 миллион теңге бөлінген
Солтүстік Қазақстан облысына қарасты Айыртау ауданында өткен жылы ғана күрделі жөндеу жасалған жол жарамсыз болып қалған. Тұрғындар бұл мәселені жергілікті әкімдікке талай жеткізген. Алайда халықтың жанайқайына құлақ асар шенеунік табылмапты, деп хабарлайды Azattyq Rýhy тілшісі.
Бірлестік, Қарақамыс және Лавровка ауылдарын жалғайтын жолды жөндеуге бюджеттен 35 миллион теңге бөлінген. Алайда, нысанның жағдайын көргенде қаражаттың өз мақсатымен жұмсалғанына күмән туады. Мердігер компания өз жұмысын шала-шарпы орындап кеткен. Ал арнайы комиссия оны қабылдаған. Енді проблеманың азабын қарапайым халық тартып отыр.
КӨЛІК САҒАТЫНА 20 ШАҚЫРЫМ ЖЫЛДАМДЫҚПЕН ҚОЗҒАЛАДЫ
Меңдібай Тәжібаева облыс орталығынан 180 шақырым қашықтықта орналасқан Қарақамыс ауылында тұрады. Елдімекенде жалпы саны алпыстан астам шаңырақ түтін түтетіп отыр. Ауылды таратпай сақтап отырған халық негізінен мал өсіріп, егін егумен айналысады. Ешкімге қол жаймай, өздері күн көріп отырған көпшіліктің негізгі проблемасы – жолдың мүшкіл жағдайы.
«Біздің ауылды аудан орталығымен байланыстыратын Светлое, Қарақамыс, Дәуқара, Егіндіағаш және Сырымбет елдімекендерінің бойымен өтетін тасжолдың жағдайы нашар. Сапарға шыққан сайын жол азабын көресің. Әр метр сайын ошақтың орнындай болып үңірейген ой-шұңқыр. Қол созым жердегі ауылға сағатына 15-20 шақырым жылдамдықпен жүруімізге тура келді. Қыс кезінде қар астында қалатындықтан бұл тесіктер жолаушыға аса сезілмейді. Алайда, ақ ұлпа ерігені сол еді, қайтадан Алдар көсенің шапанын көргендей болдық», - дейді Қарақамыс ауылының тұрғыны Меңдібай Тәжібаев.
ЖОЛ МӘСЕЛЕСІНЕ БИЛІК ӨКІЛДЕРІ ҚҰЛАҚ АСПАЙДЫ
Көктем келіп, қар кетісімен тұрғындардың азабы қайта басталады. Әсіресе, жаңбырлы күндері жеңіл автокөлікпен жүру мүмкін емес. Жол талғамайтын техниканың өзі батып қалады.
«Жол азабын жергілікті билік өкілдеріне талай айттық. Біраз мекеменің табалдырығын тоздырдық. Былтыр ауыл ақсақалы Өміртай Жүсіповпен бірге аудан әкімінің қабылдауында болып, бұйымтайымызды ашық айтқан болатынбыз. Басшы жағдаймен таныс екендігін жеткізіп, биыл жолға жөндеу жүргізіледі деп сендірген. Алайда, жуырда әкіміміз ауысып кетті. Енді көптің тілеуі орындалмай қала ма деп күдіктенеміз. Жаңа әкімнің құлағына алтын сырға, егер тиісті жөндеу жүргізетін болса, бұған дейінгідей жүрдім-бардым емес, сапалы атқарғанын қалаймыз. Ағайынның базынасы ескеріліп, Қарақамыстың тамырына қайтадан қан жүгіртер күрежол жөнделер деп үміттенеміз», - дейді Меңдібай Тәжібаев.
МЕРДІГЕР МІНДЕТІН ОЛҚЫ ОРЫНДАЙДЫ
Лавровка мен Қарақамыс арасындағы жол 2018 жылы жөнделуі тиіс болатын. Бірақ мердігер компания жұмыстың жартысын ғана атқарды деп отыр тұрғындар. Әсіресе, Бірлестік пен Қарақамыс ортасында жолдың сиқы сын көтермейді. Бірлестік ауылының тұрғыны Мұхтар Талапкерұлы көрші елдімекенге жұмыс бабымен күнде қатынайды екен. Екі ортадағы 15 шақырым ойық-ойық жолдың азабын әбден тартқанын айтады.
«Жолды жөндегенде үлкен шұңқырлар қалып қояды. Жай ғана тесік-шұрықты жаба береді. Одан мердігер компания жөндеу жұмыстарына кететін шикізатты үнемдейді. Осылайша тапсырыста белгіленген жолдың шаршы метрін толтырады. Бұл жолмен жүріп көрмеген адамдарға тіптен қиын. Әсіресе, түнде көліктің асты қатты соғылады, дөңгелек жиі жарылады. Талай келеңсіздіктер болып жатады», - дейді ол.
Бұл асфальт жолдың салынғанына 40 жылдан асқан. Сондықтан тұрғындар жыл сайын ескіні жөндеп, есті шығарғанша біржола ауыстыру қажет екендігін айтады.
«Жыл сайын әкімге барамыз. Содан Бірлестік пен Қарақамыстың арасын жөндеуге 28 миллион теңге ақша бөлінген. Соның жартысын салды ма, салмады ма, бір жерді шамалы жамады да, секіріп-секіріп кетті. Қатты қуанып едік. Бір шетін ғана көрдік. Қалғаны жоқ», - дейді ашынған ауыл тұрғыны Есмұқан Байтөленов.
ӘКІМДІК МЕРДІГЕРДІҢ МІНДЕТІН ОРЫНДАҒАНЫН АЛҒА ТАРТТЫ
Ал жолды жөндеуге тапсырыс берген Айыртау ауданы әкімдігінің тұрғын үй коммуналдық шаруашылығы бөлімі мердігер өз жұмысын атқарғанын алға тартты.
«2018 жылы Лавровка – Қарақамыс тас жолындағы 10 мың шаршы метрді жөндеуге 28 миллион теңге бөлінді. Былтыр, 2019 жылы 2 мың шаршы мерді жөндеуге 6 миллион 800 мың теңге бөлінді. Бұл қаржыға ой-шұңқырлар жамалды. Бір жері түгенделсе, екіншісі тесіледі. Мердігер өз міндетін орындады. Жол мәселесін шешу жолдары қарастырылуда. Қазір құжаттармен жұмыс істеп жатырмыз», - дейді аудандық Тұрғын үй коммуналдық шаруашылығы бөлімінің басшысы Сәкен Өтебаев.
Биыл Солтүстік Қазақстанда «Нұрлы жол» бағдарламасы аясында жалпы ұзындығы 770 шақырым жолды жөндеу жоспарланған. Қалпына келтіру жұмыстары негізінен аудан орталықтары мен ауылішілік аумақтарды қамтымақ. Олардың да Бірлестік, Қарақамыс пен Лавровка ауылдарының күйін кешпесіне кім кепіл?
Эльмира Мәмбетқызы, СҚО