Былтыр Қазақстан мектептерінде 145 буллинг фактісі тіркелді

2024 жылдың басынан бері еліміздегі мектептерде буллингке қатысты 145 жағдай анықталды. Бұл туралы ҚР Премьер-Министрінің баспасөз қызметі мәлімдеді, деп хабарлайды Azattyq Rýhy. 

Оқушылар арасындағы қысым күшейген

Ішкі істер министрлігінің дерегінше, буллингпен күрес шеңберінде мектептерде құқықбұзушылықтарды анықтау жұмыстары күшейтілген. Нәтижесінде:

• 145 буллинг фактісі тіркелді;
• Әкімшілік жауапкершілік енгізілгеннен бері – 327 жағдай тіркелген.

21 мыңнан астам ресурс бұғатталды

Киберқылмысқа қарсы департамент интернеттегі заңсыз, балаларға қауіпті контентті бақылауды тәулік бойы жүргізеді.

• 2024 жылы 58 мыңнан астам қауіпті ресурс анықталды;
• Оның ішінде 21 мыңнан астамы Кибернадзор» арқылы бұғатталды.

Мектеп қауіпсіздігі үшін 7,5 мың полицей бекітілді

Ел бойынша барлық мектептерге 7 500-ден астам полиция қызметкері бекітілген. Сонымен қатар:

• 52 мыңнан астам құқықтық лекция өткізілді;
• Ата-аналармен түсіндіру кездесулері өтті;
• «Жасөспірім», «Назар аударыңыз – балалар!» секілді алдын алу акциялары ұйымдастырылды.

Зорлық белгілері анықталса не істеу керек

Әкімдіктер жанынан құрылған мобильді топтар кез келген зорлық-зомбылық жағдайына жедел жауап береді. Олардың құрамында:

• полиция,
• әлеуметтік қызметкерлер,
• мұғалімдер мен психологтар,
• прокуратура өкілдері бар.

«Балаларға қауіпсіз орта қалыптастыру – мемлекет пен қоғамның басты міндеті», – делінген ресми хабарламада.

Буллинг деген не?

Буллинг – бұл балалар арасындағы жүйелі түрде қайталанатын қысым, мазақтау немесе қудалау. Ол психологиялық, физикалық немесе әлеуметтік сипатта болуы мүмкін.