Енді жүріп бара жатқан көліктің әйнегінен басын шығарғандарға 40 мың теңге айыппұл салынады

Ішкі істер министрлігі әкімшілік полиция комитетінің төрағасы Қайсар Сұлтанбаев биыл 13 наурыздан бастап жүргізушілер мен жолаушыларға қатысты қандай жаңа ережелер күшіне енгенін айтты, деп хабарлайды Azattyq Rýhy.

Жаңа нормалардың бірі – жүріп бара жатқан автокөліктің кабинасынан басын шығару. Әкімшілік құқықбұзушылық кодексінің 615-бабы 5-бөлігі – жолаушыға, 593-баптың 1-1-бөлігі – жүргізушіге қатысты, екі жағдайда да айыппұл мөлшері – 10 АЕК.

«Бұл норма, ең алдымен, жолаушыларды тасымалдау кезінде олардың өмірі мен денсаулығының қауіпсіздігіне бағытталған, бұрын мұндай норма болмаған. Әсіресе, мектеп бітіру кештері мен үйлену тойы кезінде көптеген адам өздерінің қауіпсіздігіне мән бермей, осындай әрекеттерге барады. Енді жүріп бара жатқан автомобильдің кабинасынан басын шығарғаны үшін 10 айлық есептік көрсеткіш айыппұл (39 320 теңге)салынады», - деп мәлімдеді Сұлтанбаев Орталық коммуникациялар қызметінде өткен брифингте.

Сондай-ақ пойыздарда жазатайым оқиғаларды болдырмау үшін темір жол өткелін өту ережелерін бұзғаны үшін айыппұл мөлшері 10-нан 20 АЕК-ке (607-баптың 1-бөлігі немесе 79 мың теңге) көбейді. Егер жол ережесін бұзу салдарынан жол апаты болса, жүргізуші 9 айға жүргізуші куәлігінен айырылады.

«Қарсы қозғалыс жолағына шыққаны үшін (ӘҚБтК-нің 596-бабы 3-бөлігі) 6 айға жүргізуші куәлігінен айыру көзделген, ал егер бұл әрекеттер жол-көлік оқиғасына әкеп соқса, онда 20 АЕК айыппұл немесе 6 айға жүргізуші куәлігінен айыру қарастырылған. Енді жазаны теңестіру мақсатында, егер қарсы жолаққа шығу жол апатына әкеп соқтырса, онда бұл үшін жүргізушілер 9 айға көлік жүргізуші құқығынан айырылады (596-баптың 4-1-бөлігі)», - деп түсіндірді комитет төрағасы.

Бұдан бөлек, жедел және арнаулы қызметтердің көлігіне жол бермегені үшін айыппұл 7 АЕК-тен 20 АЕК-ке дейін, ал қайталанған жағдайда 15-тен 40 АЕК-ке дейін ұлғайтылған.  

Ал ақылы тұрақты пайдаланып, кейін ақшасын төлеуден жалтарған жүргізушілерге салынатын айыппұл, керісінше, 3 АЕК-тен 1 АЕК-ке дейін азайтылып отыр.

Сонымен қатар Ішкі істер министрлігі мына бастамаларды қарастырып жатыр:

• электросамокаттарды есепке алу мүмкіндігі;
• тротуарларда самокаттардың қозғалысына шектеу енгізу;
• медициналық қарсы көрсетілімі бар адамдардың жүргізуші куәлігін қолдануын тоқтата тұру (психо-наркологиялық есепке қою, мүгедектік).