Астананың шенеуніктері жұмысқа жаппай ерте келіп, ерте кетуі мүмкін

Бүгін мәслихат отырысында Астана әкімінің орынбасары Ерсін Өтебаев қаладағы кейбір мекемелердің жұмыс уақытын өзгертуді ұсынды, деп жазады Azattyq Rýhy. 

Осылайша, Өтебаев атап өткендей, қалада таңғы көлік кептелісін азайтуға мүмкіндік туады.

«Қазір біз қозғап жатқан мәселенің бірі – бұл мекемелердің жұмыс уақытын ауыстыру. 2017 жылдан бері әкімдіктің жұмысы 08:30-дан басталады. Біз орталық атқарушы компаниялардың жұмыс уақытын ауыстыру мәселесін үкімет деңгейінде талқылаймыз. Бәлкім, кейбір мекемелерде жұмыс уақыты жарты сағатқа не бір сағатқа ауысар, бұны әлі талқылаймыз», - деді Ерсін Өтебаев.

Ал оның баяндамасындағы слайдқа жүгінсек, қала әкімдігі:

• емханалар мен ауруханалардың жұмыс уақытын таңғы 07:30-дан;
• балабақшалар мен мектептердің жұмыс уақытын таңғы 08:00-ден;
• министрліктердің жұмыс уақытын 08:30-дан;
• Ұлттық компаниялардың жұмыс уақытын 08:30-дан;
• банктердің жұмыс уақытын 09:30-дан;
• сауда және бизнес орталықтардың жұмыс уақытын сағат 10:00-ден бастауды ұсынып отыр.

«Біз бұл мәселені әлі пысықтаймыз. Бірақ, осылайша қаладағы көлік кептелесін азайтуға болады», - деді Ерсін Өтебаев.