Ведомство мұндай жағдайда не істеу керегін айтты
Әділет министрлігі алаяқтарға алданбаудың жолын айтты, деп хабарлайды Azattyq Rýhy.
Алаяқтар өздерін сот орындаушылары ретінде таныстырып, азаматтардан берешекті өтеуді талап етеді, немесе шоттардың, мүліктің және тағы басқаларының бұғатталғаны туралы хабарлайды.
«Егер Сізге осындай қоңырау түссе немесе хабарлама келсе, ақпаратты Әділет министрлігінің, республикалық және өңірлік жеке сот орындаушылар палатасының ресми сайттарында өз бетіңізше тексеріп, қажет болған жағдайда банкке қоңырау шалуға кеңес береміз. Атқарушылық іс жүргізудің бар екендігі туралы мәліметтерді тексеру үшін АИС ОИП (атқарушылық іс жүргізу органдарының автоматтандырылған ақпараттық жүйесі) қосымшасын да пайдалануға болады. «Борышкерлер мен тыйымдар тізілімі» батырмасын таңдап, тек ЖСН енгізу керек», - деді Әділет министрлігінің ресми өкілі Талғат Уәли.
Оның түсіндіруінше, егер сіз борышкер болсаңыз, онда сіздің қарызыңыз туралы ақпарат, сот орындаушысының аты-жөні және оның телефоны шығады. Егер сіз борышкер болмасаңыз, онда қызғылт сары түспен «сұраныс бойынша ештеңе табылмады» деген жазу шығады. Бұл сіздің шоттарыңыз бен мүліктеріңізге ешкім тыйым сала алмайтынын білдіреді.
Министрлік тек ресми дереккөздерге сенуге шақырды. Қосымша ақпарат алу үшін мына телефондарға хабарласыңыз: 119 немесе 8 7172 58-00-58.