Тұрғындармен тиімді диалог: Алматыда халықтың мүддесіне бағытталған жобалар

Қазақстан Республикасының президенті Қасым-Жомарт Тоқаевтың бастамасымен 2019 жылдан бері жүзеге асырылып келе жатқан «Халық үніне құлақ асатын мемлекет» қағидаты қоғаммен тиімді өзара әрекеттесудің жаңа форматы ретінде қарастырылады. Бұл мемлекеттік саясат халықтың мүддесін ескере отырып, басқару жүйесін жетілдіруге, мемлекеттік органдар мен халық арасындағы диалогты нығайтуға бағытталған. Алматы қаласында да бұл қағидат өз көрінісін тапқан бірнеше маңызды шара мен жоба қамтиды. Azattyq Rýhy материалынан Алматыда атқарылып жатқан шаруалар жайлы оқи аласыз.

ТҰРҒЫНДАРҒА АРНАЛҒАН АШЫҚ АЛАҢДАР МЕН ДИАЛОГТЫҚ ПЛАТФОРМАЛАР

Алматы қаласында «Халық үніне құлақ асатын мемлекет» қағидатын жүзеге асыру үшін бірнеше ашық алаң мен диалогтық платформа құрылған. Бұл платформалар азаматтардың өз мәселелерін ортаға салып, мемлекеттік органдардың жауаптарын тыңдауға мүмкіндік береді.

Қоғамдық кеңестер мен жиындар. Қалада қоғамдық кеңестердің жұмысы белсенді жүргізіледі. Алматының әр ауданында, сондай-ақ қалалық деңгейде қоғамдық кеңестер құрылып, онда тұрғындардың ұсыныстары мен шағымдары тыңдалады. Бұл кеңестердің құрамында жергілікті тұрғындар, қоғамдық ұйымдар мен белсенді азаматтар да бар. Кеңестерде талқыланатын мәселелер қала инфрақұрылымын жетілдіруден бастап, экологиялық жағдай мен әлеуметтік мәселелерге дейін қамтылады.

Осындай жиындардың бірінде жуырда қала әкімі Ерболат Досаевтың төрағалығымен «Инклюзивті Алматы» бағдарламасының тұжырымдамасы талқыланды. Отырыста «Инклюзивті Алматы» тұжырымдамасын жасау, инклюзивті білім беру жүйесін жетілдіру, сол сияқты ерекше қажеттілігі бар азаматтарды әлеуметтік қолдау бағытында түйткілді мәселелер көтерілді.

Жиынға қала әкімінен бөлек, ерекше қажеттілігі бар азаматтардың құқықтарын қорғаумен айналысатын қоғамдық ұйым жетекшілері, қоғамдық кеңес мүшелері мен мемлекеттік органдардың өкілдері қатысты.

«Бүгінгі жасап жатқан әрбір іс-әрекетіміз, шешіміміз қаламыздың болашағын қалыптастырады. Алматы барлық тұрғынға әділ әрі қамқор көзқарас танытып, үлгі болуы тиіс. Осы мақсатқа жету үшін бар күшімізді салып, жұмысты жалғастырып, жаңа идеялар енгізіп, бастамаларымызды қолдауды жалғастыруымыз керек», – деді Ерболат Досаев осы жиында.

Қала әкімдігі өткізген бұл іс-шара «Халық үніне құлақ асатын мемлекет» қағидатына сай келетінін аңғаруға болады.

Е-өтініштер мен онлайн платформалар. Алматы қаласы тұрғындарының ұсыныстары мен сұрақтарына жедел жауап алу үшін электронды өтініштер платформалары енгізілген. Мысалы, «Open Almaty» мобильді қосымшасы мен веб-платформа арқылы азаматтар өздерінің мәселелерін қала әкімдігіне тікелей жолдай алады. Бұл платформа тұрғындардың мәселелерін тез арада шешуге және әкімдікке халықтың нақты талаптарын түсінуге көмектеседі.

Қазіргі уақытта Алматы қаласы тұрғындарының өтініші негізінде «Open Almaty» ресми парақшасында «дейін және кейін» айдары тұрақты түрде жүргізіліп тұрады. Ол жерде тұрғындар тарапынан түскен өтініш бойынша атқарылған іс-шараға есеп беріледі. Ал егер сіз тұратын ауданда қандай да бір қиындық болса, «Open Almaty-ға» мына тәсілдермен өтініш беруге болады: Фронт-офис: Абай даңғылы, 90, жұмыс кестесі: жұмыс күндері сағат 08.00-18.00, сенбі 10.00-15.00; Колл-орталық: 1308, 338 33 88; портал: open-almaty.kz (өтініш беру үшін ЭЦҚ қажет болған жағдайда).

ЖЕРГІЛІКТІ АТҚАРУШЫ ОРГАНДАРДЫҢ АШЫҚТЫҒЫ

Алматы қаласының әкімдігі мен басқа да мемлекеттік органдары халыққа есеп беру форматтарын кеңейтті. Мысалы, қала әкімдігі тұрғындармен кездесулер ұйымдастырып, есеп беру жиындарын өткізеді. Осы кездесулерде тұрғындар өздерін толғандыратын мәселелерді ашық айта алады.

Әкімнің халықпен кездесулері. Алматы қаласының әкімі Ерболат Досаев қала тұрғындарымен жыл сайын есеп беру кездесулерін өткізіп тұрады. Сол сияқты әрбір ауданның тұрғындарымен жеке кездеседі. Оған жүздеген алматылық қатысып, әкімдіктің атқарған шаруаларынан жақынырақ хабардар болады. Мұндай жиындарда шаһар басшысы тұрғындардың мәселелерін тыңдап, олардың сауалдарына жауап берді. Әсіресе, қала инфрақұрылымын жақсарту, жол қауіпсіздігін арттыру, экологияны сақтау және әлеуметтік мәселелерді шешу бағытындағы бастамаларға ерекше назар аударылды. Әкім халықтың ұсыныстары мен пікірлерін ескеріп, олардың қажеттіліктеріне сай жұмыстар атқарылатынын жеткізді. Кездесу «халық үніне құлақ асатын мемлекет» қағидатын нығайтуға және тұрғындармен тікелей байланыс орнатуға бағытталған маңызды қадамдардың бірі болды.

Қала бюджетін талқылау. Жергілікті бюджет бойынша қоғамдық тыңдаулар да тұрақты түрде ұйымдастырылып келеді. Алматыда қала бюджетін талқылау – тұрғындардың қатысуымен жүзеге асырылатын маңызды үрдіс. Жергілікті бюджет бойынша қоғамдық тыңдаулар тұрақты түрде ұйымдастырылып, қала тұрғындарының мемлекеттік қаржы жүйесіне қатысты пікірлері мен ұсыныстары тыңдалады. Бұл тыңдауларды өткізу арқылы қала әкімдігі бюджеттің қалай бөлінетіні, қандай салаларға қаржы жұмсалатыны, бюджет қаржысының қаншалықты тиімді пайдаланылатыны жайлы ашық ақпарат береді. Алматыдағы қоғамдық тыңдаулар – тұрғындардың, үкіметтік емес ұйымдардың, сарапшылардың және басқа да мүдделі тараптардың өз пікірлері мен ұсыныстарын білдіруге мүмкіндік алатын алаң болып саналады. Бұл іс-шараларда азаматтар өздерін толғандырған мәселелерге қатысты нақты сұрақтар қойып, қала бюджетіндегі қаржының қандай бағыттарға жұмсалатынынан хабардар болады.

Жаяу жүргіншілерге арналған жолдар мен көлік инфрақұрылымы. Қаладағы жаяу жүргіншілер жолдарын кеңейту және көлік қозғалысын жеңілдету мақсатында бірнеше ірі жоба іске асырылды. Алматы қаласының тұрғындары көптеген жылдар бойы жаяу жүргіншілер үшін қауіпсіз жолдардың аздығы мәселесін көтеріп келген еді. Осыған орай, Алматы әкімдігі қалада жаңа веложолдар мен жаяу жүргіншілер жолдарын салып, қала тұрғындарының өтініштерін жүзеге асырды. Қала тұрғындарының игілігі үшін жүзеге асқан бұл жоба жыл сайын орындалып тұрады. Сондай-ақ, қоғамдық көлік жүйесі мен көлік кептелісін азайтуға бағытталған шаралар да қолға алынған.

Осылайша, Алматыда «Халық үніне құлақ асатын мемлекет» тұжырымдамасы аясында жүзеге асырылған шаралар қала тұрғындарының мемлекетті басқаруға қатысуын арттыруда және қоғамдық қатынастарды жақсартуда маңызды рөл атқарып отыр. Қала тұрғындарының мемлекеттік органдармен өзара әрекеттесуі ашық әрі қолжетімді болып, олардың пікірлері мен ұсыныстары басқару процесіне тікелей әсер етуге мүмкіндік беруде. Алматы әкімдігі түрлі қоғамдық қабылдаулар, ашық есік күндері мен пікірталастар өткізу арқылы тұрғындардың мәселелеріне жедел назар аударып, олардың ұсыныстарын назарға алады. Сонымен қатар, әлеуметтік желілер мен арнайы мобильді қосымшалар арқылы тұрғындардың шағымдары мен сұрақтарына жылдам жауап берілуі әкімдіктің жұмысын ашық әрі халыққа жақын етеді. Бұл шаралар тұрғындардың құқықтары мен мүдделерін қорғауға бағытталған нақты шешімдер қабылдауға ықпал етуде.