Тұрғындарға кептелістің алдын алу үшін өз бағдарын алдын ала жоспарлау ұсынылды
Елордада бірнеше көше жөндеу жұмыстары жүргізілетіндіктен 25 мамырға дейін ішінара жабылады, деп хабарлайды Azattyq Rýhy тілшісі қала әкімдігіне сілтеме жасап.
Нұр-Сұлтан қаласының көлік және жол-көлік инфрақұрылымын дамыту басқармасы қаланың көше-жол желісін орташа жөндеу шеңберінде Жеңіс даңғылы бойынша Кенесары көшесінен Бұқарбай батыр көшесіне дейінгі учаскеде жөндеу жұмыстарын жоспарлап отыр.
Сондай-ақ Бұқарбай батыр көшесі бойынша Жеңіс даңғылынан Ирченко көшесіне дейінгі учаскеде жол жүру бөлігі ішінара жабылады. Бұл жұмыстар 15-25 мамыр аралығында жүргізіледі.
«Елорда тұрғындары мен қонақтары қала жолдарындағы кептелістің алдын алу үшін өз бағдарын алдын ала жоспарлауы қажет. Келтірілген қолайсыздықтар үшін кешірім өтінеміз және жөндеу жүргізуге түсіністікпен қарауды сұраймыз», – деді көлік және жол-көлік инфрақұрылымын дамыту басқармасының өкілдері.