Алақандай жерге 14 қабатты үй сала жаздады - елордалық адвокат заңсыз құрылыспен қалай күресіп жүр

Астаналық белсенді заңсыз салынбақ болған көппәтерлі үйдің құрылысын дер кезінде тоқтатып, оның орнына қоғамға пайдасы көп жасыл-желекті саябақты орнатуға қол жеткізді.

Адвокат Әлімжан Жұбатқанов қаланың көркін бұзып, тұрғындардың мазасын қашыратын заңсыз құрылыстар проблемасымен қалай күрескені туралы Azattyq Rýhy тілшісіне айтып берді.

«Біз Бауыржан Момышұлы бойында орналасқан Ақшаңырақ тұрғын үй кешенінде тұрамыз. 17 және 15 қабатты үйлер бар. Алдымызда жіңішке ғана Дауылпаз 11 көшесі орналасқан. Өзі 0,2810 гектар ғана жерді алатын көшені 2021 жылы қоршап қойды. Тар көшені қоршаған соң, бәрімізге қиындығын тигізе бастады. Көлік өте алмайды, жаяу жүргіншіге де ыңғайсыз. Сол жердің тұрғыны ретінде қандай нысан салынбақ екенін білу үшін сұрастырып көрдім. Сөйтсем, 14 қабатты үйдің құрылысы екен. Алақандай жерге тағы да тұрғын үй салса, қауіпті жағдай артады, бұл заңға сай емес. Сондықтан құзырлы органдарға шағымдандым. Қоғамға пайдалы дүниеге арналсын. Гүлбақ, балалар алаңы салынсын деп талап еттім. Бұл туралы Президент Қасым-Жомарт Тоқаевтың Астана мен Алматы қаласының әкімдеріне берген тапсырмасы да бар ғой. 2022 жылы бұрынғы елорда әкімі Алтай Көлгіновтың қабылдауында болдым», - дейді белсенді.

Әлімжан Жұбатқановтың шағымынан кейін қалалық Бас жоспарға өзгеріс енгізіледі. Қаулы шыққан соң көпқабатты үй салмақ болған кәсіпкер сквердің құрылысына қарсы болып, Астана әкімдігін сотқа берген. Іс әкімшілік сотта 3 ай бойы қаралады. Белсенді сот  процесіне қатысуға рұқсат алу да оңайға түспегенін айтады.

«Ақшаңырақ тұрғындарының мүддесін қозғайтын сот отырысынан қалыс қалмау үшін азаматтардан қол жинадым. Ақыры сотқа кірдім. Ақшаңырақты салған құрылыс компаниясының өкілін де қатыстыруға рұқсат алдым. Кез келген кәсіпкер үй құрылысын бастамас бұрын сол жердің халқының пікіріне құлақ асуы керек. Бұл - заңда жазылған ереже. Сот істі біздің мүддемізге шешті. Жаңадан үй салмақ болған кәсіпкердің өтінішін қанағаттандырудан бас тартты», - деді адвокат.

Әлімжан Жұбатқановтың келесі міндеті саябақ құрылысына қол жеткізу үшін жерді мемлекет меншігіне өткізу еді.

«Сотта жеңдік деп қуанғанымызбен, ол жерге саябақ құрылысын бастату шаруасы күтіп тұрды. 2023 жылы Астана қасының әкімі болып Жеңіс Қасымбек тағайындалды. Мен ол кісінің алдына кірдім. Мәселені түсіндірдім. Көпқабатты үй салына жаздап аман қалған жерді мемлекет мұқтажы үшін қаланың әкімшілік балансына кіргізу керек. Ол үшін жер иесіне ақшасын төлеу керек. Жеңіс Қасымбек дереу тиісті органдарға тапсырма берді. Іс алға жүрді», - деді спикер.

Айтуынша, 0,2810 гектар жер 150 млн теңгеге бағаланған.

Адвокат қазір сквердің құрылысы қарқынды жүріп жатқанын айтты. Оған қаражатты Алматы ауданының әкімдігі бөлген. Ақшаңырақ тұрғын үй кешеніне шамамен 200-дей адам қоныстанған.

«Гүлбақтың құрылысы 10 тамызда аяқталады деп отырмыз. 15 орындық қойылады. Ағаштарды отырғызуға орындар дайындалды. Айналамыздың әрі кіріп қалды. Жақында демалып отыруға болатын әп-әдемі саябағымыз пайда болатынына көршілер қуанып жүр. Кейбірі келіп, алғысын жаудырып жатады», - дейді белсенді.

Әлімжан Жұбатқанов азаматтарды өз қоршаған ортасы, жайлы өмірі үшін құқықтарын белсенді қорғауға шақырады. Оның сөзінше, заңға сүйенген адам мәселесін әрқашан дау-дамайсыз шеше алады.