Сарбаздың анасы ұлының кіші сержанттан таяқ жегенін айтқан
Отарда әскерде әлімжеттік көріп, комаға түскен 19 жастағы сарбаз Нұржігіт Әбділпат есін жиды, деп хабарлайды Azattyq Rýhy.
Бұл туралы @poisk_region_10 отрядының еріктілері хабарлайды.
«Маусым айының соңында сарбаз комадан шықты. Алайда, саңырау күйде болды, бұрын жүргізілген трахеостомияға байланысты сөйлей алмады. Арада 1 ай өтті. Нұржігіттің жағдайы айтарлықтай жақсарды. Жігіттің ата-анасы қазақстандықтарға қолдау көрсеткені үшін алғыс білдіреді», - деп жазды еріктілер.
Естеріңізге сала кетейік, қатардағы жауынгер Нұржігіт Әбділпат 2024 жылдың 15 мамырында әскерге кетіп, 9 маусымда комаға түскен. Әскери полиция сарбазға ЖРВИ диагнозы қойылғанын айтып, медициналық пунктке жеткізілгені туралы хабарлаған. Бірақ оның денесінде ұрып-соғу іздері болғаны артынша анықталды.
Ол Жамбыл облысы Қордай ауданы Отар ауылындағы №30212 әскери бөлімінде Отан алдындағы борышын өтеуге аттанған. Анасының айтуынша, ұлының кіші сержант ұрған болуы мүмкін.
Президент Қасым-Жомарт Тоқаев болған оқиғаның мән-жайына мұқият тергеу жүргізуді және кінәлілерді жазалауды талап етті.
Сарбазды комаға жеткізген әскери қызметшіге қатысты тергеу жүріп жатыр. Алайда, сарбаздың ата-анасы бұл істің ҚР ҚК 451-бабының 1-тармағы «билікті теріс пайдалану» бабы бойынша ғана қаралып жатқанына наразы. Олар ҚР ҚК-нің 106-бабы «Денсаулыққа қасақана ауыр зиян келтіру» орын алды деп есептейді.