Аталған фактіге байланысты сотқа дейінгі тергеу амалдары басталды
Жамбыл облысы Сарысу ауданының 33 жасар тұрғыны өз-өзіне қол жұмсап қайтыс болды. Бұл туралы облыстық Денсаулық сақтау басқармасының баспасөз қызметінен мәлім етті, деп хабарлайды Azattyq Rýhy.
Басқарма мәліметінше, оқиға Тараз қаласындағы Жамбыл облыстық перинаталдық орталығында 10 сәуір күні орын алған. Аяғы ауыр келіншек жүктіліктің он алтыншы аптасында болған.
«Жүкті әйел жалған толғақ диагнозымен ОПС бақылауында болды және тиісті ем алды. Жүкті жағдайда болған кезде психологиялық ауытқулар байқалмаған. Оқиға орнына жедел-тергеу тобы келді. Аталған фактіге байланысты құқық қорғау органдары 105-баптың 1-бөлігі, яғни, өзін-өзі өлтіруге итермелеу бойынша сотқа дейінгі тергеу амалдарын бастады, сот-медициналық сараптамасы жүргізіліп жатыр. Ақпарат тергеу аяқталғаннан кейін жарияланады», – делінген ресми ақпаратта.
Айта кетейік, марқұмның артында жолдасы және 3 баласы қалды. Балаларының үлкені 6 жаста болса, екеуі балабақшаға барады.
Полиция департаментінің мәліметінше, аталған факт бойынша қылмыстық іс қозғалып, жан-жақты тексеру жұмыстары жүргізіліп жатыр. Кешенді сараптама тағайындалған, оны Жамбыл облыстық сот сараптамасы институтының мамандары жүргізеді.